उज्यालो नेपाल अभियानले सामाजिक, आर्थिक र राजनीतिक क्षेत्रमा रूपान्तरण ल्याउने छ: कुलमान घिसिङ

काठमाडौँ । नेपाल विद्युत् प्राधिकरणका निवर्तमान कार्यकारी निर्देशक कुलमान घिसिङले उज्यालो नेपाल अभियानले सामाजिक, आर्थिक र राजनीतिक क्षेत्रमा रूपान्तरण ल्याउने बताएका छन् ।

बेलायत भ्रमणबाट फर्किने क्रममा शनिवार त्रिभुवन अन्तर्राष्ट्रिय विमानस्थलमा पत्रकारहरूसँग कुरा गर्दै उनले यस्तो बताएका हुन् । पत्रकारहरूसँग कुरा गर्दै उनले भने, ‘सामाजिक, आर्थिक र राजनीतिकलगायत समग्र क्षेत्रलाई रूपान्तरणको लागि यो अभियानले एउटा जागरण ल्याउँछ र युवा शक्तिलाई सबै क्षेत्रमा नेतृत्व लिनको लागि प्रेरित गराउँछ ।’

‘देशभित्र एउटा आत्म निर्भर अर्थतन्त्र बनाउँदै, देशभित्र रोजगारी, सुशासन कसरी सिर्जना गर्ने भन्ने विषयमा पनि यसले जागरण ल्याउँछ र देशभित्र नीति र नेतृत्व सही हुनुपर्छ र त्यसको लागि पनि यसले एउटा दबाब सिर्जना गर्छ यो अभियान एउटा राष्ट्रिय अभियानको रूपमा अगाडि बढ्नु पर्छ भनेर हामी लागेका छौ । यसमा यो भ्रमणहरूले धेरै महत्त्वपूर्ण भूमिकाहरू खेल्ने उनको भनाई छ ।

उनले भ्रमणका क्रममा जुन जुन व्यक्ति र संस्थाहरूसँग अन्तरक्रियाहरू भयो त्यो एकदमै फलदायी र सफलतापूर्वक भएको बताए । उक्त भ्रमणले आगामी दिनमा आफ्ना पाइला अगाडि बढ्नका लागि एकदमै महत्त्वपूर्ण भूमिका खेल्ने उनको विश्वास छ ।

उनले भने, ‘म विद्युत् प्राधिकरणबाट बाहिर निस्किएपछि, मलाई विभिन्न सङ्घ संस्थाहरूले निमन्त्रणा गर्नु भएको थियो । त्यो निमन्त्रणालाई स्वीकार गरेर पनि गएको हुँ । त्यो क्रममा जुन जुन व्यक्ति र संस्थाहरूसँग मेरो अन्तरक्रियाहरू भयो त्यो एकदमै फलदायी, सफल र राम्रो भएको छ । यसले आगामी दिनमा मेरो पाइला अगाडि बढ्नको लागि पनि एकदमै महत्त्वपूर्ण भूमिका खेल्छ भन्ने लाग्छ । यो उज्यालो नेपाल अभियान भनेर हामीले जुन भन्ने गरेका छौ । यसबारे देश विदेशमा रहेका सबैलाई स्पष्ट पार्नको लागि पनि यो भ्रमण फलदायी रह्यो ।’

यस्तै, उनले सामाजिक, आर्थिक र राजनीतिकलगायत समग्र क्षेत्रलाई रूपान्तरणको लागि यो अभियानले एउटा जागरण ल्याउने भन्दै युवा शक्तिलाई सबै क्षेत्रमा नेतृत्व लिनको लागि पनि यसले प्रेरित गर्ने बताए ।

उनी अमेरिकाको ६ वटा स्टेटमा करिब १२ वटा कार्यक्रमहरूमा सहभागी हुनुको साथै उज्यालो नेपालसँग सम्बन्धित विषयहरूमा धेरै नै राम्रो सुझाव, छलफल र बहस भएको उनको भनाई छ ।

पत्रकारले रुपन्देहीको चुनाव बारे प्रश्न गर्दा उनले एउटा ठाउँको लागि भनेर अभियान सुरु नगरेको भन्दै रुपन्देहीको विषयलाई त्यति महत्त्व नदिएको बताए । बाहिर रहेका युवाहरूको बुझाई भनेको नेपाल रूपान्तरण हुनुपर्छ र नेपालमा अब समृद्धि आउनु पर्छ भन्ने हो ।