कप्तान रोहितको शतकमा नेपालले साउथ अस्ट्रेलियालाई हरायो

काठमाडौं । कप्तान रोहितकुमार पौडेलको कप्तानी शतकको मदतमा नेपालले साउथ अस्ट्रेलियाविरुद्धको पहिलो एकदिवसीय खेलमा रोमाञ्चक जित दर्ता गरेको छ । आज भएको खेलमा नेपाल २ विकेटले विजयी भएको हो ।

अस्ट्रेलियाले जितका लागि दिएको २४२ रनको लक्ष्य नेपाले ४४.१ ओभरमा ८ विकेट गुमाएर पूरा गर्यो । नेपालको जितमा कप्तान रोहितले महत्वपूर्ण शतक प्रहार गरे । उनी १०२ बलमा १०१ रन बनाएर नटआउट रहे । लगातारको विकेट पतनका कारण धर्मराएको नेपाल रोहित र सोमपाल कामीको उत्कृष्ट साझेदारीले जिततर्फ लम्ब्यायो । सोमपालले ३० बलमा नटआउट ३८ रन जोडे । उनीहरुले ६१ बलमा ८३ रनको साझेदारी खेले ।

त्यसअघि ब्याटिङ गरेको साउथ अस्ट्रेलिया निर्धारित ४५ ओभरमा २४२ रनमा अलआउट बनाएको थियो । साउथ अस्ट्रेलियाका लागि ह्‍यारी मानेन्तीले सर्वाधिक ६३ रन र दुवित हूगानबोजमले ५३ रन बनाएका थिए।

नेपालका लागि भने सोमपाल कामी र नन्दन यादवले समान ३र३ विकेट लिए। यसैगरी सन्दीप लामिछाने, शाहब आलम र रुपेश सिंहले समान १/१ विकेट लिएका थिए ।

नेपालले आगामी विश्वकप छनोटको तयारीका लागि अस्ट्रेलियामा अभ्यास खेल खेलिरहेको हो। यसअघि नेपालले साउथ अष्ट्रेलियासँग २ टि२० खेल खेलेको थियो । तर दुवैमा हार व्यहोरेको थियो । पहिलो खेलमा ३ विकेटले पराजित भएको नेपाल दोस्रो खेलमा ३ रनले स्तब्ध भएको थियो ।

त्यसअघि नेपालले अस्ट्रेलियामा जारी टप एण्ड टी–२० सिरिज खेलेको थियो । जसमा नेपालले ४ खेलमा हार र २ खेलमा जित निकालेको थियो ।