इजरायली हवाई आक्रमणमा यमनका हुथी प्रधानमन्त्रीसहित मन्त्रीहरूको मृत्यु

काठमाडाैं : यमनको राजधानी सानामा बिहीबार गरिएको इजरायली हवाई आक्रमणमा हुथी विद्रोही नियन्त्रित सरकारका प्रधानमन्त्री अहमद गालिब अल–रहावी मारिएका छन्।

उनीसँगै ऊर्जा, परराष्ट्र, श्रम, युवा तथा खेलकुद, सामाजिक मामिला र सूचना मन्त्रीसहित कैयौँ वरिष्ठ अधिकारीहरूको पनि मृत्यु भएको अन्तर्राष्ट्रिय सञ्चारमाध्यमहरूले जनाएका छन्।

हुथी सुप्रीम पोलिटिकल काउन्सिलका प्रमुख महदी अल–मसातले घटनाबारे पुष्टि गर्दै यो आक्रमणमा पहिलो पटक हुथीका शीर्ष नेतृत्व स्तरका व्यक्तिहरू मारिएको बताएका छन्। आक्रमणमा घाइते पनि भएको भए पनि सङ्ख्या र विवरण सार्वजनिक गरिएको छैन।

इजरायलले भने आक्रमणलाई इरान समर्थित हुथी समूहका सेनाप्रमुख, रक्षा मन्त्री र अन्य शीर्ष अधिकारीहरूलाई लक्षित गरी गरिएको जनाएको छ। तर रक्षा मन्त्री मारिएका वा नभएका विषयमा अझै पुष्टि भएको छैन।

एक वर्षअघि प्रधानमन्त्री बनेका रहावी वास्तविक नेतृत्व उपप्रधानमन्त्री मुहम्मद मिफ्ताहमार्फत हुँदै आएको थियो। रहावीको मृत्यु पुष्टि भएपछि मिफ्ताहलाई कार्यवाहक प्रधानमन्त्री तोकिएको छ।

सन् २०१४ मा तत्कालीन राष्ट्रपति अलि अब्दुल्लाह सालेहलाई हटाएपछि यमनमा गृहयुद्ध सुरु भएको हो। त्यसयता सानास्थित हुथी प्रशासन र एडनस्थित साउदी समर्थित सरकारबीच सत्ता विभाजन हुँदै आएको छ।

हमासविरुद्ध इजरायल–गाजा युद्ध सुरु भएयता हुथीहरूले रातो सागरमा व्यापारी जहाज र इजरायलतर्फ मिसाइल आक्रमण गर्दै आएका थिए। त्यसको जवाफमा इजरायलले हुथी नियन्त्रणका क्षेत्रमा निरन्तर प्रहार गरिरहेको छ।

शनिवार इजरायली रक्षा मन्त्री इजरायल काट्जले यो आक्रमणलाई “हुथीविरुद्धको विनाशकारी प्रहार” भन्दै यो केवल सुरुआत मात्र भएको चेतावनी दिएका छन्।

हुथी सञ्चालित समाचार एजेन्सी सबाले रक्षा मन्त्री मोहम्मद अल–अतिफीको वक्तव्य प्रकाशित गर्दै समूह इजरायलसँग लामो सामना गर्न तयार रहेको जनाएको छ।

गत वर्षभरि इजरायलले हमास र हिजबुल्लाहका वरिष्ठ नेता र कमान्डरहरूलाई लक्षित गर्दै शृङ्खलाबद्ध हत्या गरिसकेको छ। बिहीबारको आक्रमणलाई पनि उही रणनीतिअन्तर्गत हुथी शीर्ष नेतृत्वमाथि गरिएको ठानिएको छ।