छोरीलाई जन्म दिएलगत्तै प्रदेशसभा सदस्य सरिता पुनको निधन

काठमाडौँ : लुम्बिनी प्रदेशसभा सदस्य सरिता पुनको निधन भएको छ। शनिवार काठमाडौँको त्रिवि शिक्षण अस्पताल, महाराजगन्जस्थित मनमोहन सेन्टरमा उपचारको क्रममा उनको मृत्यु भएको हो।

एमाले पोलिटब्युरो सदस्य तथा रुकुम पूर्वका इन्चार्ज खेममान खड्काका अनुसार रुकुम पूर्व, तकसेराकी पुनले केही दिनअघि शल्यक्रियामार्फत छोरीलाई जन्म दिएपछि स्वास्थ्यमा समस्या देखिएको थियो। त्यसपछि दोस्रो शल्यक्रियामार्फत उनको मुटुमा कृत्रिम ‘भल्भ’ प्रत्यारोपण गरिएको थियो। तर उपचार सफल नहुँदा उनको निधन भएको खड्काले जानकारी दिए।

उपचारमा संलग्न चिकित्सकहरूका अनुसार पुनको स्वास्थ्य जटिल बनेपछि एकैपटक दुई वटा शल्यक्रिया गरिएको थियो। थप उपचारका लागि केही दिनअघि मात्रै उनलाई काठमाडौँ ल्याइएको थियो।

समानुपातिक निर्वाचन प्रणालीमार्फत लुम्बिनी प्रदेशसभा सदस्य बनेकी पुन एमाले लुम्बिनी प्रदेश संसदीय दल अन्तर्गत अर्थ, पर्यटन तथा विकास समितिकी सदस्यसमेत थिइन्।