धनुषामा मूर्ति विसर्जनको क्रममा दुई समुदायबिच विवाद

जनकपुर : धनुषाको जनकपुरधाम उपमहानगरपालिका वडा नं. २० देवपूरा रुपैठामा हिन्दु र मुस्लिम समुदायबिच विवाद उत्पन्न भएको छ ।

गणेश पूजाको मूर्ति विसर्जन गर्ने क्रममा हिन्दु र मुस्लिम समुदायबिच विवाद उत्पन्न भएपछि ढुङ्गा हानाहान भएको हो । 

ढुङ्गा हानाहान भएपछि भएको भाग दौडको क्रममा दुई जना स्थानीय घाइते भएको जिल्ला प्रहरी कार्यालय धनुषाले जनाएको छ । घाईतहरुको नाम खुल्न बाँकी रहेको छ ।

धनुषा प्रहरीले स्थिति नियन्त्रणमा लिन अहिलेसम्म एक दर्जन अश्रुग्याँस प्रहार गरेको छ । स्थिति नियन्त्रणमा लिन नजिकका प्रहरी चौकीहरूबाट पनि अतिरिक्त टोली परिचालन गरेको धनुषा प्रहरीले जानकारी दिएको छ । 

स्थिति नियन्त्रणमा रहेको धनुषा प्रहरीले दाबी गरे पनि दुवै समुदायबिच कुनै सम्झौता भने भएको छैन । स्थानीयहरू अझै आक्रोशित देखिएका छन् भने सो स्थानमा व्यापक प्रहरी परिचालन गरिएको छ ।