एमालेको विधान महाधिवेशन : ओलीलाई तेस्रो कार्यकाल दिलाउने कि भण्डारीलाई अघि सार्ने ?

काठमाडौँ : नेपाल कम्युनिस्ट पार्टी (एमाले)को ११औँ विधान महाधिवेशन नजिकिँदै गर्दा नेतादेखि कार्यकर्ता पङ्क्तिसम्म नेतृत्व चयनलाई नै मुख्य एजेन्डा बनाउने तयारी देखिएको छ ।

विधान, नीति र कार्यक्रममाथिको छलफलभन्दा बढी बहस पार्टीको भावी अध्यक्ष कसले सम्हाल्ने भन्नेमा केन्द्रित हुन थालेको छ ।

शनिवार ललितपुरमा आयोजित कार्यक्रममा महासचिव शङ्कर पोखरेलले पूर्वराष्ट्रपति विद्या भण्डारीलाई सम्मानित भूमिकामा बस्न सुझाव दिँदै ओलीको नेतृत्वमा विकल्प नरहेको दाबी गरे । त्यस्तै, उपमहासचिव प्रदीप ज्ञवालीले भण्डारीको पार्टी सदस्यता नवीकरण हुने सम्भावना नै नरहेको ठोकुवा गर्दै, पूर्वराष्ट्रपतिले अब पार्टीगत नभई अभिभावकीय भूमिकामा रहनुपर्ने बताए ।

विधान महाधिवेशन (भदौ २०–२२) मा एमालेले ७० वर्षे उमेर हदम्याद र पदाधिकारीलाई दुई कार्यकालसम्म मात्र नेतृत्व गर्न पाउने प्रावधान हटाउने तयारी गरेको छ । यसबाट अध्यक्ष केपी शर्मा ओलीलाई तेस्रो कार्यकालको बाटो खुल्ने देखिन्छ ।

तर, भण्डारी पक्षधर नेताहरू यसलाई चुनौती दिँदै फरक दस्ताबेज तयार गर्ने अभियानमा छन् । वरिष्ठ उपाध्यक्ष ईश्वर पोखरेल, उपाध्यक्षद्वय युवराज ज्ञवाली, सुरेन्द्र पाण्डे र कर्णबहादुर थापासहितका नेताहरूले ७० वर्षे उमेर सीमा र दुई कार्यकालको प्रावधान जस्ताको तस्तै राख्ने र भण्डारीलाई अध्यक्षतिर अघि सार्ने रणनीति बनाइरहेका छन् ।

यसैबिच, एमाले सल्लाहकार परिषद्का अध्यक्ष अमृतकुमार बोहराले विधान महाधिवेशन मूलतः विधान सुधार र समीक्षा गर्ने प्रक्रिया भएकाले छलफल नेतृत्व भन्दा बढी व्यवस्थामै केन्द्रित भएको दाबी गरे । उनका अनुसार, विधान महाधिवेशनबाट विधान टुङ्गो लगाइने र त्यसपछि हुने राष्ट्रिय महाधिवेशनमार्फत नेतृत्व चयन हुने व्यवस्था छ ।

तर, अहिलेको बहस हेर्दा विधान महाधिवेशनलाई नै ओली बनाम भण्डारीको शक्ति प्रदर्शनको थलो बनाउन दुवै पक्ष जुटिरहेको स्पष्ट देखिएको छ ।