आन्दोलनकारी–प्रहरी झडपमा ५० जना घाइते

विराटनगर । कोसी प्रदेशसभा भवननजिक विराटनगरको दवकोटा चोकमा भएको झडपका क्रममा ५० जना घाइते भएका छन् । सुरक्षाकर्मीतर्फ ३८ र आन्दोलनकारीतर्फ १२ जना घाइते भएको हालसम्मको तथ्यांक छ । प्रदेशको नाम कोसी खारेज हुनुपर्ने र ऐतिहासिक पहिचानका आधारमा पुनः नामकरण गरिनुपर्ने माग राख्दै पहिचान पक्षधरले प्रदेशसभानजिकै प्रदर्शन चर्काएपछि झडप भएको हो । झडपमा नेपाल प्रहरीका २३ जना र सशस्त्र प्रहरीका १५ जना घाइते भएका छन् । केहीको अवस्था गम्भीर छ । सबै घाइतको विवरण प्राप्त भइनसकेको प्रहरीले जनाएको छ । घाइतेहरुको विराटनगरका विभिन्न स्वास्थ्य संस्थामा उपचार भइरहेको छ । झडपको अवस्थालाई नियन्त्रण गर्ने क्रममा प्रहरीले १६ राउण्ड हवाईफायर गरेको थियो । बाँस, लाट्ठी, भालालगायतका घरेलु हतियारसहित प्रदर्शनमा उत्रिएका आन्दोलनकारीले सुरक्षाकर्मीलाई लक्षित गरेर ढुंगामुडा गर्न थालेपछि अवस्था तनावग्रस्त बनेको थियो । प्रहरीका अनुसार सुरक्षाकर्मीमाथि ढुंगा, इँटा र बियरका बोतल प्रहार गरिएको थियो । आन्दोलनकारीले प्रहार गरेको गुलेलीले कतिपय प्रहरी घाइते भएका छन् । प्रदेशसभानजिक आन्दोलनकारीको आक्रमणमा परेर केही सुरक्षाकर्मी रगताम्य हुँदै ढलेका थिए । स्थितिलाई नियन्त्रणमा लिन सुरुमा प्रहरीले पानीको फोहोरा प्रयोग गरेको थियो । त्यसपछि अश्रुग्यास प्रहार गरिएको थियो । ‘प्रदर्शनकारी आक्रामक बनेपछि स्थिति नियन्त्रणमा लिने क्रममा हवाई फायर गरिएको प्रहरी स्रोतको भनाइ छ । देवकोटा चोकलगायत प्रदेशसभा भवन वरपरको अवस्था अहिले सामान्य बनिसकेको प्रहरीले जनाएको छ । प्रहरीले बल प्रयोग गरेर आन्दोलनकारीको भीडलाई तितरवितर पारेपछि अवस्था सामान्य बन्दै गएको हो । पछिल्लो पटक प्रदर्शनस्थलबाट प्रहरीले २४ जनालाई पक्राउ गरेको छ । त्यसअघि ३७ जना पक्राउ परेका थिए । पक्राउ परेकाको साथबाट गुलेली, ढुंगा, लाट्ठी, बाँस, भालालगायत बरामद गरिएको छ ।