निरन्तर सफाइमा बिराटनगर,थन्किएको ब्रुमर मर्मतपछि सञ्चालनमा

विराटनगर महानगरपालिकाले विगत चार वर्षदेखि थन्किएको ब्रुमर मर्मतपछि सञ्चालनमा ल्याएको छ । मर्मतपछि बुधबार कञ्चनबारीचोकदेखि नहरसम्मको सडक ब्रुमरले सफाई गरिएको हो । बिग्रिएर थन्किएको ब्रुमर मर्मततर्फ ध्यान नदिँदा बेवारिसे बनेको थियो । मेयर नागेश कोइरालाले सम्बन्धित शाखा प्रमुखलाई मर्मत गरेर सञ्चालनमा ल्याउन निर्देशन दिएका थिए । विराटनगरलाई सफा, सुन्दर, व्यवस्थित र विकसित बनाउने मेयर कोइरालाको योजनाअन्तर्गत महानगरका मुख्य र बढी आवतजावत हुने सडक पखाल्ने काम भइरहेको प्रमुख प्रशासकीय अधिकृत विष्णुप्रसाद कोइरालाले बताए । अब ब्रुमरबाट महानगरका मुख्य सडकको धुलो बढारिने उनले बताए । ‘बिग्रिएर लामो समय थन्किएका कारण मर्मत गरेर परीक्षण गरेका छौं’, कोइरालाले भने, ‘अझै परीक्षण गरेर समस्या देखिए मर्मत गरेर पूर्ण रूपमा सञ्चालनमा ल्याइनेछ ।’