भोलीबाट दूध तथा दूधजन्य वस्तुको विक्री मूल्य घटने

विराटनगर । कोशी प्रदेश डेरी उद्योग संघले आफ्ना उद्योगबाट उत्पादित दूध तथा दूधजन्य वस्तुको बिक्री मूल्य घटाउने निर्णय गरेका छन् । उद्योगहरुले दूध, दही, पनिर र नौनी घ्यूको बिक्री मूल्य घटाउने कोशी प्रदेशका ८ वटा डेरी उद्योगहरुले निर्णय गरेका हुन् । कार्तिक २३ गते विराटनगरमा बसेको बैठकले किसानको दूधको बजार सुनिश्चितता गर्न तथा हाल दूधको उत्पादन बढी भएको समयमा उपभोक्तालाई समेत राहत प्रदान गर्ने उद्देश्यले कार्तिक २६ गतेदेखि लागू हुने गरी मूल्य घटाएको हो । घटाएको मूल्य अनुसार अब उपभोक्ताले स्ट्याण्डर दूध आधा लिटरको मूल्य ४५, लो फ्याट मिल्क आधा लिटरको ३५, दही २ सय मिलिलिटरको ३५, आधा लिटरको दही ८०, एक लिटर दहीको १५०, पनिरको प्रतिकेजी ७८० र नौनी घ्यू प्रतिकेजी ८ सय रुपैयाँमा पाउने भएका छन् । उक्त मूल्य अनुसार आइतबारदेखि विक्री सुरु हुने रितिका डेरी उद्योग प्रालिका संचालक योगेन्द्र चिमरियाले बताए । झापाको विर्तामोडमा रहेको एनएमसी डेरी उद्योगका संचालक रामचन्द्र उप्रेतीको अध्यक्षतामा बसेको बैठकले यस्तो निर्णय गरेको हो । कतिपय डेरीहरुले भने कार्तिक १ गतेदेखि यो निर्णय लागू गर्ने जनाएका छन् । यस्तो निर्णय गर्ने डेरी उद्योगहरुमा एनएमसी डेरी उद्योग, कामधेनु दुग्ध विकास संहकारी संस्था लि., रितिका डेरी उद्योग, सूर्योदय मिल्क एण्ड वेभरेज इ. प्रा.लि., गोरस डेरि प्रा.लि., जीवन विकास डेरी, मदानी मिल्क हाउस र शिवम डेरी एण्ड फुड इन्डष्ट्रिज प्रा.लि. रहेका छन् ।