अनलाइनबाट हुने यौनजन्य दुर्व्यवहार न्यूनीकरण सम्बन्धी तालिम सम्पन्न

इटहरी / लागु औषध नियन्त्रण तथा अनलाइनबाट हुने यौन दुर्व्यवहार न्यूनीकरण सम्बन्धी एक दिने अभिमुखीकरण कार्यक्रम इटहरीमा सम्पन्न भएको छ । इलाका प्रहरी कार्यालय इटहरी सँगको साझेदारीमा भ्वाईस अफ चिल्ड्रेन संस्थाको साइबर सेफ्टी परियोजना कार्यक्रम अन्तर्गत लागु औषध नियन्त्रण तथा अनलाइनबाट हुने यौन दुर्व्यवहारको बारेमा उक्त अभिमुखीकरण कार्यक्रम लक्षित रहेको थियो । अभिमुखी कार्यक्रममा ९० जना विद्यार्थी ले सहभागिता जनाएका थिए । बालबालिकाहरूको क्षमता अभिवृद्धि मार्फत सशक्तीकरण गरी अनलाइनबाट हुने यौनजन्य दुर्व्यवहारका घटनाहरू न्यूनीकरण गर्नका लागि तालिम सञ्चालन गरिएको भ्वाईस अफ चिल्ड्रेन संस्थाको साइबर सेफ्टी परियोजनाका कार्यकारी कर्मचारी प्रकाश परियारले बताए । बालबालिका मार्फत समाजका धेरै जना नागरिकहरूलाई बालबालिकाहरू माथि हुने शारीरिक मानसिक दण्ड तथा यौनजन्य दुर्व्यवहारका सूचना प्रवाह गर्न सकिने साथै बालबालिकाहरू लागु औषधमा धेरै फस्ने भएकोले न्यूनीकरण गर्न सहयोग पुग्ने भएकोले बालबालिकाहरूका लागि सचेतना कर्यक्रमहरु सञ्चालन गर्दै आएको उनले बताए । इलाका प्रहरी कार्यालय इटहरी प्रहरी निरीक्षक शम्भु बस्नेतले लागु औषध न्यूनीकरण सम्बन्धी सहजिकरण गरेका थिए । उनले बालबालिकाहरूलाई लागु औषधमा नफस्न र यसले आफूलाई मात्र असर गर्ने नभई आफ, घर, परिवारलाई पनि असर गर्ने भएकोले यसमा नफस्न आग्रह गरे ।