कामधेनु दूग्ध विकास सहकारीमा यादव ढकाल निर्वाचित

इटहरी : इटहरीमा रहेको कामधेनु दूग्ध विकास सहकारी संस्था लिमिटेडको २३ औँ साधारणसभाबाट यादव ढकाल अध्यक्षमा निर्वाचित भएका छन् । सोमबार सम्पन्न साधारणसभाबाट अध्यक्षका प्रत्यासीहरू हिक्मतबहादुर काफले र गोविन्द रेग्मीलाई पराजित गर्दे ढकाल अध्यक्षमा निर्वाचित भएका हुन् । ढकालले कूल २ सय १६ मत प्राप्त गर्दै निर्वाचित भएका हुन् । अध्यक्षका प्रतिष्पर्धी काफ्लेले ७६ मत र रेग्मीले ३० मत प्राप्त गरे । निर्वाचन अधिकृत मोहन भट्टराईका अनुसार उपाध्यक्षमा इन्द्रबहादुर बानियाँ निर्वाचित भएका छन् । उनले वेदप्रशाद दाहाललाई पराजित गर्दे उपाध्यक्षमा निर्वाचित भएका हुन्। यसैगरी सदस्यहरूमा राजेन्द्र अधिकारी, बाबुराम कार्की, विनोदप्रसाद गुरागाईँ, लुमहरी कोइराला, रामप्रसाद काफ्ले र इश्वरीप्रसाद वस्ती निर्वाचित भएका छन् । यस्तै, लेखा समिति संयोजकमा देवीप्रसाद भटराई निर्वाचित भएका छन् । समितिकै महिला सदस्यहरूमा भने भोजकुमारी निरौला, शारदा खतिवडा र सीता भटराई फुयाँल सर्वसम्मत निर्वाचित भएका छन् । सर्वसम्मत चयन हुनेमा लेखा समिति सदस्य पदम सुवेदी, नगेन्द्रजंग थापा रहेका छन् । कामधेनुमा ४ सय ४१ जना सेयर सदस्य रहेका छन् । दैनिक ११ हजार लिटर दूध तथा दूग्धजन्य पदार्थहरू बिक्री हुँदै आएको बताइएको छ । को हुन् ढकाल ? अध्यक्षमा विजयी ढकाल दुई दशकयता कृषि क्षेत्रमा सक्रिय छन् । मोरङको ग्रामथान गाउँपालिकामा बस्दै आएका ढकालले मोरङको सुनवर्षी नगरपालिकामा १० बिगाहा जमिनमा माछापोखरी, बाख्रापालन समेत गर्दे आएका छन् । १५ वर्ष व्यवसायिक कृषककै रूपमा प्रवेश गरेका ढकाल डेरी इन्चार्ज रहेर दुई वर्ष, सञ्चालक सदस्य भएर दुई कार्यकाल बिताएका छन् । दूग्ध सहकारीका रूपमा रहेको कामधेनुमा अध्यक्ष भएपश्चात नश्ल सुधारका क्षेत्रमा पहिलो काम गर्ने, किसानको पहुँचमा रहने गरेर दाना उद्योग सञ्चालन गर्ने बताए । यस्तै, ३ सय ६५ दिननै पशुहरूलाई हरियो तथा पोसिलो आहार व्यवस्थापनका लागि साइलेज उत्पादनमा जोड दिने र दूग्ध उत्पादन तथा बजारीकरणमा सहभागी भएका कामधेनुको कार्यक्षेत्रभित्रका एक हजार कृषक तथा व्यापारीहरूलाई सदस्य बनाउने उदेश्य राखेको बताए ।