अपाङ्गता जस्तो संवेदनशील विषयलाई राष्ट्रले नै आत्मसाथ गर्न सकेको छैन: सभामुख घिमिरे

काठमाडौँ । सभामुख देवराज घिमिरेले अपाङ्गता जस्तो संवेदनशील विषयलाई राष्ट्रले नै आत्मसाथ गर्न नसकेको बताएका छन् । बुधवार काठमाडौँमा आयोजित अपाङ्गता भएका युवाहरूको राष्ट्रिय सम्मेलनलाई सम्बोधन गर्दै उनले संविधानले भेदभाव रहित कानुन बनाउने कुराको ग्यारेन्टी गरेसँगै कानुनहरू निर्माण भएतापनि कार्यान्वयनमा भने फितलो रहेको बताए । उनले भने, ‘संविधानले भेदभाव रहिद कानुन बनाउने कुराको ग्यारेन्टी गरेको छ । अपाङ्गता भएका व्यक्तिहरूको सम्मानको कुराहरू पनि गरेको छ । कानुन बन्न निर्देशित गर्छ र बनेका पनि छन् । तर कानुनहरू कार्यान्वयन गर्ने सन्दर्भमा अझै पनि धेरै कमीहरू भइरहेका छन् । यो क्षेत्रको संवेदनशीलतालाई पहिलो कुरा परिवारले, समाजले र राष्ट्रले आत्मसाथ गर्न सकिरहेको छैन । जति आत्मसाथ गराउन सक्छौँ त्यति नै यो क्षेत्रको समावेशिता हुन सक्छ ।’ उनले नीति, सिद्धान्त र त्यसलाई कार्यान्वयन गर्ने राज्यका विभिन्न अङ्गहरूले अपनाएर मात्रै समावेशिता सम्भव नरहेको धारणा राखे । विभिन्न क्षेत्रमा अपाङ्गता भएका समुदायमा आर्थिक हैसियत वृद्धि गर्न सके मात्रै समावेशीताको बलियो आधार बन्न सक्ने उनको भनाई छ । उनले भने, ‘समावेशिताको कुरा गरिरहँदा समावेशिता नीति र सिद्धान्त र त्यसलाई कार्यान्वयन गर्ने तह र राजयका विभिन्न अङ्गहरूले यसलाई अपनाएर मात्रै सम्भव छैन । मेरो विचारमा समावेशिता सक्षम हुनुपर्छ । त्यसपछि मात्रै यी कुराहरू कार्यान्वयन गर्ने आधार बन्न सक्छ । समावेशिताको लागि विभिन्न क्षेत्रमा अपाङ्गता भएका समुदायमा आर्थिक हैसियत कसरी वृद्धि गर्ने त्यो सोच्नु पर्छ । यो समुदायलाई आर्थिक रूपमा चाहिने न्यूनतम आवश्यकता परिपूर्ति गरेपछि मात्रै समावेशिताको लागि बलियो आधार बन्न सक्छ ।’