जापान सरकारले बिपी राजमार्ग मर्मतका लागि २ अर्ब ६० करोडको अनुदान सहयोग प्रदान

काठमाडौँ : जापान सरकारले बिपी राजमार्गको पुनर्निर्माण र मर्मतका लागि २ अर्ब ६० करोड रुपैयाँ बराबरको अनुदान सहयोग प्रदान गरेको छ। आज अर्थ मन्त्रालयमा आयोजित कार्यक्रममा नेपाल सरकार र जापान सरकारबीच अनुदान सम्झौतापत्रमा हस्ताक्षर भएको मन्त्रालयले जनाएको छ।

सम्झौतापत्रमा अर्थमन्त्री रामेश्वरप्रसाद खनाल र गृहमन्त्री ओमप्रकाश अर्यालको उपस्थितिमा मन्त्रालयका सचिव घनश्याम उपाध्याय र जापानका राजदूत तोรุ मायुडाले हस्ताक्षर गरे।

बिपी राजमार्ग महोत्तरीको बर्दिवासदेखि काभ्रेको धुलिखेलसम्म १५९ किलोमिटर लम्बाइको राजमार्ग हो र राजधानी काठमाडौँलाई पूर्वी तराईसँग जोड्ने नेपालको महत्वपूर्ण राष्ट्रिय राजमार्ग हो। यो राजमार्ग जापान सरकारकै सहयोगमा निर्माण गरिएको थियो।

गत वर्षको बाढी र पहिरोका कारण राजमार्गका विभिन्न खण्डमा क्षति पुगेको थियो, विशेषगरी रोशी नदी आसपासका भाग पूर्ण रुपमा प्रभावित भएका थिए। जापानको अनुदानले ती क्षतिग्रस्त खण्डको पुनर्निर्माण र मर्मतमा सहयोग पुग्नेछ।

सम्झौतापत्रमा नेपाल तर्फबाट अर्थ मन्त्रालयका वैदेशिक सहायता समन्वय महाशाखाका सहसचिव धनिराम शर्मा र जापानतर्फबाट जापान अन्तरराष्ट्रिय सहयोग एजेन्सी (जाइका) नेपालका प्रमुख प्रतिनिधि मित्सुजाकी मिजुकीले हस्ताक्षर गरेका थिए।

समारोहमा अर्थमन्त्री खनालले जापानलाई विश्वसनीय र भरपर्दो विकास साझेदार भन्दै नेपालमा पूर्वाधार निर्माण र सामाजिक–आर्थिक विकासमा निरन्तर सहयोगका लागि आभार व्यक्त गरे। जापानी राजदूत मायुडा र जाइकाका प्रमुख प्रतिनिधि मित्सुजाकीले पनि नेपाल–जापान सम्बन्ध र सहयोगका विविध क्षेत्रका महत्वबारे धारणा राखेका थिए।