भद्रपुरमा दुई जना नाबालिकामाथि यौनहिंसा, एक पक्राउ, अर्काको खोजी तीव्र

झापा । झापाको भद्रपुरमा दुई जना नाबालिकामाथि जबरजस्ती करणी भएको आरोपमा एक युवकलाई प्रहरीले नियन्त्रणमा लिएको छ भने घटनामा संलग्न अर्का अभियुक्त फरार छन् ।

जिल्ला प्रहरी कार्यालय झापाका अनुसार भद्रपुर नगरपालिका–५ का २३ वर्षीय विवेक राई पक्राउ परेका हुन् । सोही घटनामा संलग्न अर्का युवक अक्षय सापकोटा भनिने व्यक्ति फरार रहेकाले उनको खोजी कार्य तीव्र पारिएको प्रहरी नायव उपरीक्षक खगेन्द्रबहादुर खड्काले जानकारी दिए ।

प्रहरीका अनुसार मंसिर २८ गते दिउँसो भद्रपुर नगरपालिका–५ स्थित एक घरमा १५ र १३ वर्षीया दुई नाबालिकालाई बोलाई फरक–फरक कोठामा लगेर जबरजस्ती करणी गरिएको उजुरी प्राप्त भएपछि अनुसन्धान सुरु गरिएको हो । पीडित पक्षको जाहेरीका आधारमा राईलाई पक्राउ गरिएको प्रहरीले जनाएको छ ।

घटनापछि पीडित नाबालिकाको मेची प्रादेशिक अस्पताल, भद्रपुरमा स्वास्थ्य परीक्षण गरिएको छ भने आवश्यक कानुनी प्रक्रिया अघि बढाइएको जिल्ला प्रहरी कार्यालयले जनाएको छ ।

 प्रहरीले फरार अभियुक्तको खोजी तथा घटनासम्बन्धी थप अनुसन्धानलाई प्राथमिकताका साथ अघि बढाइरहेको जनाएको छ ।