भाटभटेनीको २४ औं स्टोर विरगञ्जमा, बजार विस्तारमा थप आक्रामक

विरगञ्ज । मुलुककै ठूलो चेन सुपरस्टोर सञ्चालन गरिरहेको भाटभटेनीको २४ औं स्टोर विरगञ्जमा स्थापना भएको छ । मुलुकका विभिन्न शहरमा स्टोर निर्माण गरी आक्रामक बजार बिस्तार गर्दै आएको भाटभटेनीको विरगञ्ज शाखा शुभारम्भ भएको हो । यो स्टोर मधेश प्रदेशमा पहिलो स्टोर हो । नेपालमै अन्तराष्ट्रिय स्तरको सपिङ सेवा र अनुभव प्रदान गर्ने उद्देश्यले देशभरका ठूला शहरहरुमा भाटभटेनीको सेवा विस्तार गरिएको सुपर मार्केटका अध्यक्ष तथा प्रबन्ध निर्देशक मिन बहादुर गुरुङले बताए । २ अर्ब ५० करोड बढीको लागतमा स्थापना गरिएको स्टोर सञ्चालनमा आएसँगै स्थानीय २५० बढीले प्रत्येक्ष रोजगारी पाउने उनले बताए । भाटभटेनीले स्वदेशी उत्पादन र स्वरोजगारलाई विशेष प्राथमिकता दिएको उनले दाबी गरे । ‘हामीले अन्तर्राष्ट्रिय स्तरको स्टोरबाट स्थानीय जनतालाई सेवा दिने मात्रै होइन । स्थानीय उत्पादन खरिद र बिक्री तथा स्वरोजगारलाई विशेष प्राथमिकता दिएका छौं । स्थानीय किसान, उद्यमी, व्यवसायी, उद्योगले उत्पादन गरेका सामग्री खरिद गर्नुका साथै स्थानीय जनशक्तिलाई रोजगार प्रदान गर्दै आएका छौं । बिरगञ्ज महानगर–१४ गण्डक, बहुअरीमा २ बिगाहा १० कठ्ठा क्षेत्रफलमा स्टोर निर्माण भएको हो । स्टोरमा २ लाख ५० हजार स्क्वायर फिटको सपिङ स्पेस रहेको तथा अण्डरग्राउण्ड बेसमेन्ट पार्किङसहित ७ तल्लाको भवन रहेको छ । यो स्टोर अहिले सम्मका सबै स्टोरहरु मध्ये भवन तथा सपिङ स्पेसको हिसाबले ठूलो रहेको भाटभटेनी सुपर स्टोरका व्यवस्थापक विनोद भट्टराईले बताए । बिर्तामोड र दमकमा पनि भाटभटेनी सञ्चालनमा आउदै मुलुक आर्थिक संकटमा परिरहेको बेला भाटभटेनीले भने बजार विस्तारलाई थप आक्रामक बनाएको छ । उद्योगी तथा व्यवसायीहरु आर्थिक रुपले थला परिरहेको समयमा भाटभटेनीले नयाँ शैलीमा आफ्नो बजार विस्तारलाई अघि बढाएको हो । मुलुकको आर्थिक संकटलाई टार्नका लागि सबै उद्योगी व्यवसायीको महत्वपूर्ण भूमिका रहने बताउँदै भाटभटेनीका अध्यक्ष तथा प्रबन्ध निर्देशक मिनबाहादुर गुरुङले बजार विस्तारलाई नरोकेको उल्लेख गरे । मधेश प्रदेश संगै कोशी प्रदेशको ठुला शहरहरु बिर्तामोड र दमकमा पनि भाटभटेनीले  सेवा बिस्तार गर्न लागेको छ । बिर्तामोड बजारमा भदौको दोस्रो साताबाट सञ्चालनमा आउने गरि  निर्माणमा जुटिरहेको भाटभटेनी स्टोरका ब्यावस्थापक बिनोद भटराईले प्रदेश खबरलाई बताए । बिरगञ्ज संगै मधेश प्रदेशको राजधानी जनकपुरमा पनि अबको केहि दिन भित्रमा भाटभटेनीको २५ औ स्टोरको उदघाटन गर्न लागिएको ब्यावस्थापक भटराईले बताए । २७ ओटै स्टोरहरु सञ्चालनमा आउदा ७ हजार बढिले प्रत्यक्ष  रुपमा रोजगारी पाउने ब्यावस्थापक भटराईले बताए ।  भाटभटेनीले तराई क्षेत्रका सहरहरुमा सुपर स्टोर संचालनमा आएपछि  छिमेकी मुलुक भारतका सिमावर्ति सहरका उपभोक्ताहरु पनि सामान किन्न र सहज शपिङको अनुभव गर्न नेपाल आउने क्रम समेत बढेको छ । पुर्बमा बिराटनगर,धरान,इटहरीमा यस अघिनै सञ्चालनमा आएको छ । अब बिर्तामोड र दमकमा भाटभटेनीले आफनो बजार बिस्तार गर्ने क्रममा स्टोर सञ्चालन गर्न लागेको हो । दमकको स्टोर भने २०८० सालको अन्त्य तिर सञ्चालनमा आउने ब्यावस्थापक भटराईले बताए ।