विराटनगरमा औषधि व्यवसायी संघको होली मिलन कार्यक्रम

विराटनगर । विराटनगरमा नेपाल औषधि व्यवसायी संघ (एनसीडीए) मोरङले बिहीबार होली मिलन कार्यक्रमको आयोजना गरेको छ । रंगहरूको पर्व होलीको अवसरमा औषधि व्यवसायीहरूबीच भाइचारा र सद्भाव बढाउने उद्देश्यले कार्यक्रम आयोजना गरिएको संघले जनाएको छ । संघका केन्द्रीय सदस्य प्रदीपकुमार दासले होली पर्वले समाजमा भाइचारा कायम गर्दै अगाडि बढ्न प्रेरित गर्ने बताए । उनले भने, ‘होली हाम्रो परम्परा र संस्कृतिको महत्वपूर्ण अंग हो । जसले हामीलाई एकअर्काप्रति सद्भाव राख्न र सहकार्य गर्न सिकाउँछ ।’ संघका कोशी प्रदेश अध्यक्ष धनबहादुर काफ्लेले सद्भावको पर्व होलीले व्यवसायीहरूमा भाइचारा कायम गर्दै अगाडी बढ्न ठूलो मद्दत पुग्ने बताए । उनले औषधि व्यवसायीहरूलाई एकताबद्ध हुन र आपसी सहयोगमा जोड दिए । कार्यक्रमका सभापति एवं संघका मोरङ अध्यक्ष देशबन्धु ढकालले रंगको पर्व होलीको शुभकामना दिँदै औषधि व्यवसायीहरूको हकहितमा केन्द्रीय कार्यालयले प्रभावकारी भूमिका निर्वाह गर्नुपर्नेमा जोड दिए । उनले खुद्रा र थोक व्यवसायीहरू मिलेर व्यावसायिक हकहितका लागि केन्द्रलाई दबाब सिर्जना गर्नुपर्ने बताए । ‘औषधि व्यवसायीहरूले सामना गरिरहेका चुनौतीहरूलाई सम्बोधन गर्न हामी सबै एकजुट हुनुपर्छ,’ ढकालले भने, ‘यसका लागि हामीले व्यावसायिक र संगठनात्मक क्षमता अभिवृद्धि गर्न आवश्यक छ ।’ सोही अवसरमा संघको कोशी प्रदेशमा नवनिर्वाचित पदाधिकारी र सदस्यहरूलाई सम्मान गरिएको थियो । नवनिर्वाचित पदाधिकारीहरूलाई सम्मान गर्दै ढकालले उनीहरूको कार्यकालमा व्यावसायिक अधिकार र हितहरूको संरक्षणका लागि प्रभावकारी पहलकदमीको अपेक्षा गरेको बताए । कार्यक्रममा कोशी प्रदेशको स्वास्थ्य मन्त्रालयका भरत साह, मेलान विराटनगरका अध्यक्ष दिनेश राउत, पिनका अध्यक्ष दुर्गा भट्टराई, नेपाल पत्रकार महासंघ कोशी प्रदेशका कोषाध्यक्ष सुदीप कोइरालालगायतले शुभकामना मन्तव्य दिएका थिए । स्वास्थ्य मन्त्रालयका साहले प्रदेश सरकार औषधि व्यवसायीहरूको समस्यालाई सम्बोधन गर्न प्रतिबद्ध रहेको बताए । उनले यस क्षेत्रमा गुणस्तरीय सेवा प्रदान गर्नका लागि सरकार र व्यवसायीहरूबीच सहकार्य आवश्यक रहेको बताए । मेलान विराटनगरका अध्यक्ष दिनेश राउतले औषधि व्यवसायीहरूले सामना गरिरहेका चुनौतीहरू सम्बोधन गर्न सामूहिक प्रयासको आवश्यकता रहेको औंल्याए । उनले होली पर्वको अवसरमा व्यवसायीहरूबीच सद्भाव र सहकार्य बढाउन जोड दिए । कार्यक्रमको अन्त्यमा सहभागीहरूले एकअर्कालाई अबिर लगाएर होलीको रौनक थपेका थिए । व्यवसायीहरूले एकअर्कालाई अबिर लगाउँदै वर्षभरि मिलेर काम गर्ने र व्यावसायिक सद्भाव कायम राख्ने प्रतिबद्धता जनाए ।