नेपालको चिया हेर्न चीनको टोली नेपालमा, इलाममा बगान तथा उद्योगको अध्ययन

इलाम : नेपालमा रहेको चियाको अध्ययनका लागि चिनिया टोली नेपाल आएको छ । नेपालस्थित चिनियाँ राजदूतावासका आर्थिक सल्लाहकार र अन्य विशिष्ट प्रतिनिधिहरूले आइतबार इलाम स्थित चियाबारीको भ्रमण गरेका हुन् । टी एलायन्स अफ नेपाल र इलाम नगरपालिकाको सहकार्यमा आयोजित भ्रमणका क्रममा चिनिया प्रतिनिधि टोली सहितको टोलीले इलामको ऐतिहासिक पुरानो चिया बगान तथा चिया उद्योग अध्ययन तथा अवलोकन गरेका हुन् । इलाम नगर प्रमुख केदार थापाले विशिष्ट पाहुनाहरूलाई स्वागत गर्दै नेपाल चीन सम्बन्धमा चियाको योगदानबारे चर्चा गरे । नेपाल र चीनबीचको सम्बन्ध ऐतिहासिक, साँस्कृतिक, तथा व्यापारिक आधारमा मजबुत रहेको बताउँदै उनले नेपालको चिया पनि चिनबाट नै नेपाल ल्याएको स्मरण गरे । उनले भने चिया हाम्रो साझा सम्पदा हो, जसले दुई देशका जनतालाई भावनात्मक रूपमा नजिक ल्याएको छ । उनले १५० वर्षअघि नेपालमा चिया खेतीको सुरुवात चिनियाँ चिया बीउको रोपणबाट भएको उल्लेख गर्दै, वर्तमानमा चियाले नेपालको अन्तर्राष्ट्रिय पहिचान बनाउन महत्त्वपूर्ण भूमिका खेलेको बताए । टी एलायन्स अफ नेपालले पनि चीन सरकारका विशिष्ट अतिथिहरूलाई स्वागत गर्दै चियाको प्रवद्र्धनका लागि सहकार्यलाई सशक्त बनाउने प्रतिबद्धता व्यक्त गर्यो। टी एलायन्स अफ नेपालको प्रतिनिधिहरूले सन् २०२४ डिसेम्बरमा चीन सरकारको वाणिज्य मन्त्रालय तथा झाङझोउ कलेज अफ साइन्स एन्ड टेक्नोलोजीको सहकार्यमा चिया व्यवसायीहरूका लागि आयोजित तालिमको महत्त्वलाई उजागर गरेका छन् । चिनियाँ राजदूतावासका प्रतिनिधिहरूले नेपालसँगको सहकार्यलाई अझ सुदृढ गर्दै नेपालको चिया उद्योगको विकासका लागि निरन्तर सहयोग गर्ने प्रतिबद्धता व्यक्त गरेका छन् । भ्रमणले नेपाल–चीन सम्बन्धलाई अझ मजबुत बनाउने विश्वास गरिएको छ । इलामको ऐतिहासिक चिया बगान तथा उद्योग अवलोकनसँगै, नेपाल र चीनबीचको कृषि तथा व्यापारिक सहकार्यलाई प्रवद्र्धन गर्ने थप अवसरहरू खोज्ने प्रतिबद्धता व्यक्त गरिएको छ ।