रास्वपा आफ्नै किसिमले जान्छ, हाउस खुल्छ- प्रचण्ड

काठमाडौँ । नेकपा माओवादी केन्द्रका अध्यक्ष पुष्पकमल दाहाल प्रचण्डले भिजिट भिसा प्रकरणमा रास्वपा आफ्नै किसिमले अगाडी बढ्ने बताएका छन् ।

कांग्रेस-एमालेसँग भएको सहमति बारे जानकारी दिदै प्रचण्डले रास्वपा आफ्नै किसिमले अगाडी बढ्ने, तर आफुहरुले उनीहरुको अडानमा विमति नराख्ने बताएका हुन् ।

प्रचण्डले भने- 'अब हाउस खुल्छ । रास्वपासँग मुलभूत विषयमा केहि फरक छैन, तर उहाँहरुका केहि अडानका कारणले सायद केहि समय आफ्नै किसिमले जानुहुन्छ, हाम्रो बीचमा विमति र आरोप प्रत्यारोप हुदैन ।' 

जेठ १३ गतेदेखि भिजिट भिसा प्रकरणमा अवरुद्ध रहेको संसद खोल्न सत्तारुढ दल नेपाली कांग्रेस, नेकपा एमाले र माओवादी केन्द्रबीच दुई बुँदे सहमतिमा हस्ताक्षर भएको छ । सो दुई बुँदे प्रस्तावमा रास्वपाले भने असहमति जनाएको छ र आफ्नो विरोध प्रदर्शन जारी राख्ने भएको छ ।