काठमाडौँ : नेपाल बैंकर्स सङ्घले एक विशेष कार्यक्रम आयोजना गरी नेपाल राष्ट्र बैंकका निवर्तमान गभर्नर महाप्रसाद अधिकारीलाई बिदाइ तथा नव नियुक्त गभर्नर डा.विश्वनाथ पौडेललाई औपचारिक स्वागत गरेको छ।
कार्यक्रममा बोल्दै निवर्तमान गभर्नर अधिकारीले आफ्नो कार्यकालमा बैङ्किङ क्षेत्रबाट प्राप्त साथ–सहयोगप्रति आभार व्यक्त गरे।
कोभिड–१९ महामारीको कठिन समय सम्झिँदै उनले उक्त सङ्कटका बेला बैङ्कहरूले देखाएको संयम, सहनशीलता र सशक्त नेतृत्वको प्रशंसा गरे। 'महामारीपछिको आर्थिक स्थायित्व राष्ट्र बैङ्कको मात्र होइन, सम्पूर्ण बैङ्किङ क्षेत्रको साझा प्रयासको परिणाम हो,' उनले उल्लेख गरे।
उनले आफ्नो कार्यकालमा गरिएका केही निर्णयहरू कठिन भए पनि ती दीर्घकालीन सुधारका दृष्टिले आवश्यक रहेको बताए।
विगतका नीतिगत कमजोरीहरूप्रति पुनरावलोकन आवश्यक रहेकोमा जोड दिँदै, भविष्यमा त्यस्ता गल्तीहरू नदोहोरिन सतर्क रहन आग्रह गरे। साथै, गभर्नर पदबाट निवृत्त भए पनि आवश्यक परेमा बैङ्किङ क्षेत्रलाई सुझाव र अनुभवमार्फत सहयोग गर्न सधैँ तयार रहेको प्रतिबद्धता पनि जनाए।
त्यसै अवसरमा नव नियुक्त गभर्नर डा. विश्वनाथ पौडेलले आफ्नो कार्यकालमा बैङ्किङ क्षेत्रलाई अझ सुदृढ, समावेशी र दीर्घकालीन विकासमुखी बनाउने सङ्कल्प व्यक्त गरे।
उनले भने, 'नेपाल राष्ट्र बैंकका प्रभावकारी नीतिहरूलाई निरन्तरता दिइनेछ, र आवश्यक सुधार त्यहीँ गरिनेछ जहाँ परिवर्तनको खाँचो महसुस हुन्छ।' साथै नीति निर्माणका क्रममा बैङ्किङ क्षेत्रसँग समन्वय र परामर्शलाई प्राथमिकता दिने स्पष्ट धारणा पनि राखे।
कार्यक्रममा उपस्थित बैङ्किङ क्षेत्रका प्रतिनिधिहरूले निवर्तमान गभर्नर अधिकारीको योगदानप्रति कृतज्ञता व्यक्त गर्दै नव नियुक्त गभर्नर पौडेललाई सफल कार्यकालको शुभकामना दिए।
कार्यक्रममा वाणिज्य बैंकका प्रमुख कार्यकारी अधिकृतहरू, नायब कार्यकारी अधिकृतहरू लगायत बैङ्किङ क्षेत्रका विशिष्ट व्यक्तिहरूको उल्लेखनीय उपस्थिति थियो।
युनिकोड
मिति रूपान्तरण
_lvFlpr7y3Z.png)
प्रदेश खबर
प्रतिक्रिया