धनुषामा तीन जना सवार मोटरसाइकल दुर्घटना, एकको घटनास्थलमै मृत्यु

धनुषा । धनुषामा तीन जना सवार मोटरसाइकल दुर्घटना हुँदा एक जनाको घटनास्थलमै मृत्यु भएको छ भने दुई जना गम्भीर घाइते भएका छन् । तीनै जनाको पहिचान खुल्न भने बाँकी रहेको छ ।

धनुषाको कमला नगरपालिका र विदेह नगरपालिकाको सीमा क्षेत्र पर्ने मुडिया सराबेको सीमामा हुलाकी मार्ग छेउमा सोमबार बिहान दुर्घटना भएको हो । धनुषाको महेन्द्रनगर जन्ती गएका तीनै जना फर्किर्ने क्रममा दुर्घटना भएको जनाइएको छ ।

मृत्यु हुने युवक धनुषाको शहिदनगर नगरपालिका वडा नं. ८ बिसरभोराका रहेको जानकारी प्राप्त भएको छ । घाइते अन्य दुई जना युवक पनि सोही वडाका नाथपट्टिका रहेका छन् ।

बिहान मर्निङ वाकमा निस्केका व्यक्तिहरूले दुर्घटना भएको देखेपछि प्रहरीलाई खबर गरेको थियो । तत्कालै आएको प्रहरीले उनीहरूलाई उपचारको लागि जनकपुर पठाएकोमा एक जनाको मृत्यु भइसकेको चिकित्सकले पुष्टि गरेको छ । थप विवरण आउन बाँकी ।