पुराना पार्टीहरूले केही गर्न सक्दैनन् भन्ने अतिरञ्जित भाष्य चिर्न आवश्यक : देउवा

काठमाडौं : नेपाली कांग्रेसका सभापति शेरबहादुर देउवाले पुराना राजनीतिक दलहरू केही गर्न सक्दैनन् भन्ने अतिरञ्जित र नकारात्मक भाष्यहरू निर्माण भएको बताएका छन् । 

सोमबार पार्टी केन्द्रीय कार्यालय सानेपामा तीज पर्वको अवसरमा आयोजित कार्यक्रमलाई सम्बोधन गर्दै उनले पुराना राजनीतिक दलहरू केही गर्न सक्दैनन् भन्ने अतिरञ्जित र नकारात्मक भाष्यहरू निर्माण गरी समाजलाई दिग्भ्रमित पार्ने काम भइरहेको बताउँदै यस्ता भाष्य चिर्न आवश्यक रहेको बताए । 

उनले भने,‘पुराना पार्टीहरूले केही गर्न सक्दैनन् भन्ने अतिरञ्जित र  अपभाष्य निर्माण गरी समाजलाई दिग्भ्रमित गर्ने कोसिस भइरहेका छन् । तर हामीले यस्ता भाष्य र चुनौतीहरू चिर्दै हामी अझ शशक्ति र क्रियाशील हुन आवश्यक छ ।

कांग्रेसका सबै शुभेच्छुकहरूलाई क्रियाशील र गतिशील बनाउँदै पार्टीभित्र वृहत् एकता कायम गरी आगामी निर्वाचनमा बहुमत ल्याइ कांग्रेसको सरकार स्थिर सरकार निर्माण गर्न सबै जना एकताबद्ध भएर अघि बढ्न आवश्यक छ ।’ 

त्यस्तै उनले ०८४ को निर्वाचनमा एकल बहुमत ल्याएर कांग्रेसको नेतृत्वमा सरकार निर्माण गर्नुपर्ने बताए । परम्पराले हाम्रो समुदायमा एक साझा फूलबारीको रूपमा प्रतिनिधित्व गर्दै आएको।बताउँदै पर्वहरू देशको गर्व र पहिचान भएको बताए । 

सभापति देउवाले तीज पर्वले महिलाहरूको आपसी सद्भाव,समानता र महिला सहभागितामा टेवा पुग्ने धारणा राखे ।