एमबीबीएस सिट १५० पुर्याउन माग

नेपालमा एमबीबीएस तहमा सिट संख्या १०० बाट १३० पु¥याउने चिकित्सा शिक्षा आयोगको हालैको निर्णयलाई निजी मेडिकल तथा डेन्टल कलेजहरूको संगठनले स्वागत गर्दै अझै न्यूनतम १५० सिट तोक्नुपर्ने माग गरेको छ।

एशोसिएन अफ प्राइभेट मेडिकल एण्ड डेन्टल कलेज अफ नेपालका अध्यक्ष प्रा.डा. ज्ञानेन्द्र मान सिंह कार्कीले शुक्रबार जारी विज्ञप्तिमा नेपालका अधिकांश सरकारी तथा निजी मेडिकल कलेजहरूको पूर्वाधार, उपकरण र दक्ष जनशक्ति उपयोग गर्न १५० सिट अनिवार्य भएको बताएका छन्।

उनका अनुसार नेपालमा विगतमा पनि मेडिकल कलेजहरूले आफ्नो क्षमताअनुसार १५० विद्यार्थीलाई अध्यापन गर्दै आएका थिए र त्यसले गुणस्तरमा असर नपरेको प्रमाणित भइसकेको छ।

संघले अपर्याप्त सिट संख्याका कारण हजारौं नेपाली विद्यार्थी विदेशिन बाध्य हुने अवस्था रहँदा नेपालमै पर्याप्त सिट उपलब्ध गराउनुपर्नेमा जोड दिएको छ। साथै, नेपालका भौगोलिक र शैक्षिक वातावरण भारतसँग मिल्दोजुल्दो भएकाले भारतीय विद्यार्थीहरूले पनि नेपालमै चिकित्सा शिक्षा लिन रुचि देखाउने भएकाले सिट खाली रहने सम्भावना न्यून हुने दाबी गरिएको छ।

“हाल कायम गरिएको १३० सिटलाई न्यूनतम १५० सिटमा पु¥याई चिकित्सा शिक्षा क्षेत्रलाई अझ सशक्त, प्रभावकारी र अन्तर्राष्ट्रिय स्तरमा प्रतिस्पर्धी बनाउन आयोगले गम्भीर पहल गर्नुपर्छ,” विज्ञप्तिमा उल्लेख छ।