इलाम सदरमुकामदेखि सन्दकपुरसम्म रेडपाण्डा म्याराथन हुने

इलाम : अन्तर्राष्ट्रिय रेडपाण्डा दिवसको अवसरमा इलाममा म्याराथन प्रतियोगिता हुने भएको छ। आगामी असोज ४ गते इलाम सदरमुकामदेखि जिल्लाकै अग्लो स्थान सन्दकपुरसम्म रेडपाण्डा म्याराथन आयोजना हुने आयोजकले जानकारी दिएका छन्।

रेडपाण्डा नेटवर्क र रेडपाण्डा संरक्षण क्षेत्रमा सक्रिय दीपज्योति युवा क्लबको संयुक्त आयोजनामा हुने सो प्रतियोगितामा सन्दकपुर गाउँपालिका, नेपाल प्रहरी, नेपाली सेना, पूर्वेली ट्याक्सी व्यवसायी संघलगायत संस्थाहरूको सहकार्य रहनेछ।

रेडपाण्डा संरक्षणसँगै खेलकुद र पर्यटन प्रवद्र्धन गर्ने उद्देश्यले प्रतियोगिता आयोजना गर्न लागिएको रेडपाण्डा नेटवर्कका व्यवस्थापक सोनाम टाँसी लामाले बताए। उनका अनुसार गत वर्ष ताप्लेजुङमा अन्तर्राष्ट्रिय स्तरको म्याराथन सम्पन्न भएकाले यसलाई निरन्तरता दिने उद्देश्यले यस वर्ष इलाममा आयोजना गर्न लागिएको हो।

राष्ट्रियस्तरको म्याराथनका लागि ४२ किलोमिटरभन्दा बढी दूरी आवश्यक हुने भएकाले यसपटक प्रतियोगिता इलाम सदरमुकामदेखि सन्दकपुरसम्म वा सन्दकपुर गाउँपालिकाको तीनकुने–सन्दकपुर–तीनकुने मार्गमार्फत गर्ने भन्नेबारे नेपाली सेना सहितको प्राविधिक टोलीले अध्ययन गर्ने क्लबका कार्यक्रम निर्देशक राम रिमालले जानकारी दिए।

बर्खायामका कारण सडकको अवस्था सुधार गर्नुपर्ने भएकाले गाउँपालिकाले आवश्यक मर्मत गर्ने तयारी गरेको सन्दकपुर गाउँपालिकाका अध्यक्ष तुलाराम गुरुङले बताए। इलाम सदरमुकाममा सरोकारवालाहरूसँग भएको छलफलले प्रतियोगिता सदरमुकामको ठूलो टुँडिखेलदेखि सन्दकपुरसम्म गर्ने सुझाव पनि दिएको छ।