नापीमा बस्दै करोडपति, ५ करोडभन्दा बढी अकुत सम्पत्ति आर्जन गरेपछि यादव परे फन्दामा

काठमाडौँ : अख्तियार दुरुपयोग अनुसन्धान आयोगले अकुत सम्पत्ति आर्जन गरेको अभियोगमा नापी कार्यालय भैरहवा, रूपन्देहीका नापी अधिकृत सुग्रीव यादवविरुद्ध विशेष अदालतमा मुद्दा दायर गरेको छ।

आयोगका अनुसार राजनीतिक व्यक्ति र विभागीय प्रमुखलाई प्रभावमा पार्दै लामो समयसम्म कार्यालय प्रमुखको जिम्मेवारी सम्हालेका यादवले गैरकानुनी रूपमा सार्वजनिक सम्पत्ति व्यक्तिको नाममा दर्ता गराई अकुत सम्पत्ति आर्जन गरेका छन्। आयोगले यादव सार्वजनिक पदमा प्रवेश गरेको २०५३ असार १३ गतेदेखि २०८१ असार १६ गतेसम्मको सम्पत्ति परीक्षण गरेको हो।

सो अवधिमा यादवले करिब ९ करोड ३ लाख ९५ हजार ४४४ वैध सम्पत्ति आर्जन गरेको देखिएको छ भने १४ करोड ८३ लाख ५७ हजार ८८४ बराबरको खर्च र लगानी गरेको पाइएको छ। यसरी वैध आय र खर्चबीच करिब ५ करोड ७९ लाख ६२ हजार ४४० बराबरको स्रोत खुल्न नसकेको आयोगले ठहर गरेको छ।

आयोगले सोही बराबरको बिगो दाबी गर्दै यादवविरुद्ध विशेष अदालतमा मुद्दा दायर गरेको छ। गैरकानुनी रूपमा आर्जन गरिएको सम्पत्ति उनले आफ्नी श्रीमती गायत्री यादव तथा छोराहरु सुधान्सु यादव र शुभम यादवका नाममा समेत राखेको पाइएको आयोगको दाबी छ।