कोशी प्रदेशमा ट्रान्सफर्मर चोरी अनुसन्धानमा सफलता, चार जना ‘सर्वोत्कृष्ट प्रहरी’ घोषित

विराटनगर : कोशी प्रदेश प्रहरी कार्यालय विराटनगरले साउन महिनाको ‘सर्वोत्कृष्ट प्रहरी’ घोषणा गरेको छ।

यस पटक ‘महिनाको उत्कृष्ट प्रहरी’मा प्रदेश प्रहरी कार्यालय विराटनगरका प्रहरी नायब उपरीक्षक दुर्गा प्रसाद दाहाल, जिल्ला प्रहरी कार्यालय मोरङका प्रहरी निरीक्षक सरोज खनाल, इलाका प्रहरी कार्यालय दोहमना मोरङका प्रहरी वरिष्ठ हवलदार विष्णु पराजुली र प्रहरी जवान समीप सुब्बालाई सम्मान गरिएको हो।

उनीहरूले मोरङ, सुनसरी र झापामा भएका ट्रान्सफर्मर चोरी घटनाको अनुसन्धानमा उल्लेखनीय सफलता हासिल गरेका थिए।

नेपाल विद्युत् प्राधिकरण प्रादेशिक कार्यालय रानी, विराटनगरसँगको सहकार्यमा प्रहरीले माघ १५ गतेदेखि सुरु गरेको अनुसन्धानमार्फत चोरी भएका २४ वटा ट्रान्सफर्मर प्रकरणमा दोषी पहिचान गर्न सफल भएको थियो।

सो क्रममा प्रहरीले साउन ९ गतेसम्म चोरीमा संलग्न १२ जनालाई पक्राउ गरेको थियो।

पक्राउ परेकासँगै प्रहरीले ट्रान्सफर्मर काट्न प्रयोग भएका विभिन्न औजार, चोरीबाट निकालिएको ३६८ किलो ५ सय ग्राम तामाको तार, को १ च ७७२९ नम्बरको पिकअप गाडी, विभिन्न कम्पनीका ५ थान मोटरसाइकल र १२ थान मोबाइल फोन बरामद गरेको थियो।

प्रदेश प्रहरीले सो सफलताले आम नागरिकमा शान्ति–सुरक्षाप्रति विश्वास बढाएको भन्दै चारै सुरक्षाकर्मीलाई ‘महिनाको सर्वोत्कृष्ट प्रहरी’ घोषणा गरी पुरस्कृत गरेको जनाएको छ।