लेटाङमा १३ वर्षीया अंशुको बीभत्स हत्या : प्रहरीले भन्यो, ‘अनुसन्धान चुनौतीपूर्ण’

विराटनगर : मोरङको लेटाङ नगरपालिका–२ स्कुलचोककी १३ वर्षीया अंशु गौतमको बीभत्स शव फेला परेको प्रकरणको अनुसन्धानमा प्रहरीलाई समस्या भइरहेको छ । 

अनुसन्धानमा विभिन्न जटिलता देखा परेकाले यथार्थ पत्ता लगाउन सकस भइरहेको प्रहरीले जनाएको छ । दुई सातादेखि बेपत्ता रहेकी अंशुको शव शुक्रबार दिउँसो बेलबारी–चिसाङ साझेदारी वनभित्र क्षतविक्षत अवस्थामा फेला परेको थियो ।

टाउको र शरीर छुट्टिएको अवस्थामा भेटिएको शवले गाउँमा त्रास, आक्रोश र पीडाको वातावरण फैलाएको छ । तर, प्रहरी अझै घटनाको निश्चित निष्कर्षमा पुग्न सकेको छैन ।

वास्तविकता पत्ता लगाउन प्रहरीलाई सकस परिरहेको छ । अंशु असोज २१ गते दिउँसो करिब साढे चार बजे घरबाट निस्किएपछि बेपत्ता भएकी थिइन् । परिवारलाई उनी कहाँ र किन गइन् भन्ने थाहा थिएन ।

अभिभावकले प्रहरीलाई खोजीको लागि जानकारी दिएपछि पनि लामो समयसम्म उनको कुनै अत्तोपत्तो लागेन । शुक्रबार दिउँसो घाँस काट्न गएका स्थानीयले जंगलभित्रबाट फैलिएको दुर्गन्ध पछ्याउँदै जाँदा शव देखेपछि प्रहरीलाई खबर गरेका थिए ।

त्यसपछि इलाका प्रहरी कार्यालय लेटाङ र जिल्ला प्रहरी कार्यालय मोरङबाट प्रहरी प्रमुख एसपी कवित कटवालको नेतृत्वमा टोली घटनास्थल पुगेको थियो । घटनास्थल बेलबारी–लेटाङको सिमानामा पर्ने साझेदारी वन क्षेत्र हो, जहाँ निकै दुर्गन्धसहितको  डर लाग्दो दृश्य देखिएको थियो ।

एसपी कटवालका अनुसार शव अत्यन्त क्षतविक्षत र बिग्रिएको अवस्थामा भेटिएको थियो । ‘टाउको र शरीर छुट्टिएको छ, प्रारम्भिक रूपमा धारिलो हतियार प्रयोग गरिएको जस्तो देखिन्छ,’ उनले भने, ‘तर, जंगलभित्र शव कुहिएको अवस्थामा भेटिएकाले जंगली जनावरको आक्रमणबाट पनि मृत्यु हुन सक्ने सम्भावना नकार्न सकिँदैन । यथार्थ कुरा अनुसन्धानपछि मात्र प्रष्ट हुन्छ ।’

घटनास्थलमा अंशुले लगाएका ट्राउजर, हाफपाइन्ट र चप्पल फुकालिएको अवस्थामा भेटिएको प्रहरीले जनाएको छ । घटनास्थलको प्रकृतिका आधारमा बलात्कारपछि हत्या गरिएको हुन सक्ने आशंका गरिएको छ । तर, शव अत्यधिक कुहिएको अवस्थामा भेटिएकाले अनुसन्धान कठिन भएको प्रहरी अधिकारीहरू बताउँछन् ।

शवको शनिबार धरानस्थित बीपी कोइराला स्वास्थ्य विज्ञान प्रतिष्ठानमा पोस्टमार्टम गरिएको छ । प्रहरीका अनुसार पोस्टमार्टमपछि डीएनए परीक्षणका लागि नमुना संकलन गरिएको छ । ‘अभिभावकले शव अंशुकै भएको बताएका छन् । तर, डीएनए रिपोर्ट आउँदासम्म औपचारिक पुष्टि गर्न सकिँदैन,’ प्रहरी स्रोतले भन्यो।

अंशु स्थानीय लक्ष्मी माध्यमिक विद्यालयमा कक्षा पाँचमा अध्ययनरत थिइन् । वडाध्यक्ष तेजप्रसाद तिम्सिनाका अनुसार उनी अत्यन्तै सामान्य र विपन्न परिवारकी बालिका थिइन् । ‘दुई सातापछि टाउको र शरीर छुट्टिएको अवस्थामा शव भेटिँदा सिंगो गाउँ स्तब्ध भयो,’ उनले भने, ‘यस्तो निर्मम अपराधले हाम्रो समाजमा कस्तो विकृति फैलिँदैछ भन्ने प्रश्न उठाएको छ ।’

घटनापछि गाउँमा शोक र आक्रोश दुवै व्याप्त छ । स्थानीय बासिन्दाले घटनालाई योजनाबद्ध हत्या भन्दै दोषीलाई तत्काल पक्राउ गर्न माग गरेका छन् । वडाध्यक्ष तिम्सिनाले पनि घटनाको स्वरूप हेर्दा बलात्कारपछि हत्या गरिएको ठम्याउन सकिने बताए । ‘अंशु हराएको दिनदेखि नै खोजीमा हामी सक्रिय थियौं । तर, यस्तो रूपले भेटिन्छे भन्ने कसैले कल्पना पनि गरेका थिएनौं,’ उनले भने, ‘अब अपराधीलाई पत्ता लगाएर कानुनको कठघरामा उभ्याउनु पर्छ ।’ 

जिल्ला प्रहरी कार्यालय मोरङले घटनाको विस्तृत अनुसन्धानका लागि इन्स्पेक्टर सरोज खनालको नेतृत्वमा पाँच सदस्यीय विशेष टोली गठन गरेको छ । टोलीले शनिबारदेखि घटनास्थल वरपरका बासिन्दासँग सोधपुछ, प्रमाण संकलन र शकास्पद व्यक्तिहरूको पृष्ठभूमि अध्ययन सुरु गरेको छ । तर, अनुसन्धानमा जटिलता बढ्दै गएको प्रहरीले जनाएको छ ।

शव कुहिएको र आवश्यक प्रमाणहरू नष्ट हुन थालेका कारण घटनाको सत्यतथ्य निकाल्न प्रहरीलाई कठिन भइरहेको छ । प्रहरीले अंशुको घर, विद्यालयका शिक्षक, सहपाठी र छिमेकीहरूसँग पनि बयान लिँदैछ । यद्यपि, अहिलेसम्म घटनामा संलग्न कोही व्यक्तिको पहिचान हुन सकेको छैन । प्रहरीले विभिन्न प्रमाण संकलन गरेर परीक्षण गर्न थालेको छ ।

घटनापछि अंशुका अभिभावक र आफन्त गहिरो शोकमा छन् । छोरीको शव देख्नेबित्तिकै आमा बिनाले थामिन सकेकी छैनन् । ‘हामीले हरेक दिन उसको पर्खाइ गर्‍यौं । फर्केर आउँछे भनेर आशा पाल्दै थियौं । तर, यस्तो अवस्थामा भेटिन्छे भनेर कहिल्यै सोचेका थिएनौं । जसले यो काम गर्‍यो, उसलाई कानुनले कडा सजाय देओस्,’ रुँदै उनले भनिन्  

लेटाङका स्थानीय पनि प्रहरीले छिटो निष्कर्षमा पुगेर दोषीलाई कारबाही गर्नुपर्ने माग गरिरहेका छन् । उनीहरूले घटनालाई नियोजित अपराध भनेका छन् । बालबालिकाको सुरक्षामा स्थानीय सरकार र विद्यालय प्रशासनले पनि ध्यान दिनुपर्ने उनीहरुको माग छ । 

प्रहरीले भने घटनालाई अत्यन्त संवेदनशील मानेर अनुसन्धान अगाडि बढाइएको जनाएको छ । ‘पोस्टमार्टम रिपोर्ट, डीएनए परीक्षण र फरेन्सिक अनुसन्धानपछि मात्र घटनाको वास्तविकता खुल्नेछ,’ एसपी कटवालले भने, ‘तर, घटनाको प्रकृति हेर्दा गम्भीर आपराधिक गतिविधिको संकेत मिलिरहेको छ ।’

हालसम्म घटनासँग सम्बन्धित कुनै ठोस सुराक नपाए पनि प्रहरीले अनुसन्धानलाई तीव्र बनाइएको जनाएको छ । विद्यालयका विद्यार्थी, शिक्षक र गाउँलेहरू सबै अंशुको न्यायको माग गर्दै छन् ।

एसपी कटवालले भने, ‘हामी अनुसन्धानका सबै सम्भावित कोणबाट अघि बढिरहेका छौं । अपराधीलाई छिटो पहिचान गरेर कारबाहीको दायरामा ल्याउने हाम्रो पहिलो प्राथमिकता हो ।’ तर, घटनास्थलको अवस्था र प्रमाणको सीमितताले अनुसन्धानमा गम्भीर चुनौती थपेको प्रहरीको निष्कर्ष छ । अंशुको परिवार र आफन्त अहिले पनि न्यायको प्रतीक्षामा छ । उनीहरुले अपराधी कानुनको कठघरामा ल्याउँदा मात्रै न्याय मिल्ने बताए ।