सरकारी कार्यालय आगजनी गर्ने नेकपा नेतासहित पाँच जना पक्राउ

विराटनगर : जेनजी आन्दोलनका क्रममा विराटनगरको सरकारी कार्यालय आगजनी गर्ने समूहका नाइके मध्येका एक ताजिम अन्सारीसहित पाँच जना पक्राउ परेका छन् ।

अन्सारी नेपाली कम्युनिष्ट पार्टीका स्थानीय नेता हुन् । अमनलाल मोदी सामान्य प्रशासन मन्त्री हुँदा उनी स्वकीय सचिव थिए ।

गत भदौ २४ गते अन्सारीले सरकारी कार्यालयहरुमा तोडफोड र आगजनी गर्ने एउटा समूहको नेतृत्व गरेका थिए ।

तोडफोड र आगजनीमा संलग्न भएको देखिएपछि पक्राउ गरेको मोरङका निमित्त प्रवक्ता प्रहरी निरीक्षक लेखनाथ दाहालले जानकारी दिए । उनका अनुसार अन्सारी विराटनगरको बजारबाट पक्राउ परेका हुन् ।

प्रहरीका अनुसार उनीसहित राजिव यादव, अरुण साह सोनार, महेश नेपाल र आवाज पौडेल पक्राउ परेका छन् । उनीहरुमाथि अनुसन्धान भइरहेको प्रहरीले जनाएको छ ।