चासोमा ओलीको चीन भ्रमण : परीक्षामा प्रधानमन्त्री

काठमाडौँ : प्रधानमन्त्री एवं नेकपा एमाले अध्यक्ष केपी शर्मा ओली शनिवार चीन भ्रमणमा जाँदैछन् । तर, यसअघि नै उनी राष्ट्रियताको मुद्दामा कडा ‘परीक्षा’मा परेका छन् ।

चीनको सांघाई सहयोग सङ्गठन (एससीओ) शिखर सम्मेलनमा सहभागी हुन जाँदै गरेका ओलीले लिपुलेक प्रकरणलाई समकक्षीसँग उठाउँछन् कि उठाउँदैनन् भन्ने प्रश्न अहिले नेपालको राजनीतिक वृत्तमा चर्को बहस बनेको छ ।

भारत र चीनले नेपालको सहभागिताबिना लिपुलेकलाई व्यापारिक मार्ग बनाउन सहमति गरेको घटनापछि प्रधानमन्त्री ओलीलाई राष्ट्रियताको सवालमा ‘अग्निपरीक्षा’ दिनुपर्ने अवस्था आएको हो ।

सात वर्षअघि भारतले नाकाबन्दी गर्दा अडानका लागि चर्चामा आएका ओलीले त्यसबेला नै कालापानी, लिपुलेक र लिम्पियाधुरासहितको नयाँ नक्सा जारी गरेका थिए । तर, अहिले त्यही भूभागलाई छिमेकीले प्रयोग गर्ने सहमति गर्दा नेपालको सार्वभौमिकतामा प्रश्न उठेको छ ।

राजनीतिक विश्लेषकहरू भन्छन्, प्रधानमन्त्री ओलीले चीन भ्रमणका क्रममा राष्ट्रपति सी चिनफिङसँग मात्र नभई भारतीय प्रधानमन्त्री नरेन्द्र मोदीसँग हुने साइडलाइन भेटमा पनि यो विषय कडाइका साथ उठाउनै पर्छ ।

भारतका लागि पूर्वराजदूत दीपकुमार उपाध्यायले भने, ‘लिपुलेक प्रकरण नेपालको राष्ट्रियता र अस्तित्वसँग जोडिएको छ । प्रधानमन्त्रीले यसलाई प्राथमिकतामा राखेर संवाद थाल्न जरुरी छ ।’

यसैबिच, प्रमुख प्रतिपक्षी दल माओवादी केन्द्रका अध्यक्ष पुष्पकमल दाहालले समेत कालापानी–लिपुलेक समस्यालाई आपसी संवादमार्फत समाधान गर्न सरकारलाई सुझाव दिएका छन् । उनले अघिल्लो कार्यकालमा भारत भ्रमणकै क्रममा प्रधानमन्त्री मोदीले सीमा विवाद वार्ताबाट हल गर्ने प्रतिबद्धता जनाएको स्मरण गराए ।

प्रधानमन्त्री ओली शुक्रवार संसद्मा सम्बोधन गर्दै चीन भ्रमणबारे जानकारी दिने र सीमा विवादमा सरकारको आधिकारिक धारणा राख्ने कार्यक्रम तय भएको छ । लामो समयदेखि संसद् छलेको आरोप खेपिरहेका ओलीले यस पटक कस्तो जवाफ दिन्छन् भन्ने विषयमा आम चासो छ ।

प्रधानमन्त्रीसँगै भ्रमणमा शिक्षा मन्त्री रघुजी पन्त, संस्कृति मन्त्री बद्रीप्रसाद पाण्डे, कांग्रेस उपसभापति पूर्णबहादुर खड्का, प्रधानमन्त्रीका सल्लाहकार युवराज खतिवडा लगायत सहभागी हुनेछन् ।