मन्त्रीहरूले राजीनामा दिन अस्वीकार गरेपछि जसपा र लोसपा सरकारबाट बाहिरिँदै

काठमाडौँ : पार्टीबाट सरकारमा पठाइएका मन्त्रीहरूले राजीनामा दिन अस्वीकार गरेपछि दुई मधेशवादी दल सरकारबाट बाहिरिने तयारीमा पुगेका छन् ।

प्रधानमन्त्री केपी शर्मा ओली नेतृत्वको सरकारमा सहभागी मन्त्रीहरूले पार्टीको निर्देशन नटेरेपछि जनता समाजवादी पार्टी (जसपा) र लोकतान्त्रिक समाजवादी पार्टी नेपाल (लोसपा) दुवै दलले सरकारलाई समर्थन कायम राख्दै सरकारबाट बाहिरिने निष्कर्ष निकालेका हुन् ।

अशोक राई नेतृत्वको जसपाले गत शनिवार (७ भदौ) को बैठकमार्फत आफ्ना मन्त्रीहरूलाई फिर्ता बोलाउने निर्णय गरेको थियो ।

जसपाले महिला, बालबालिका तथा ज्येष्ठ नागरिकमन्त्री नवलकिशोर साह र खानेपानीमन्त्री प्रदीप यादवलाई फिर्ता गरी सांसद डा. वीरेन्द्र महतो र रञ्जु झालाई मन्त्री बनाउन सिफारिस गरेको हो ।

मन्त्री साह र यादवलाई ११ भदौभित्र राजीनामा दिन निर्देशन दिइएको थियो । तर, बिहीबारसम्म पनि दुवै मन्त्रीले राजीनामा नदिएपछि जसपा सरकारले छाड्ने निर्णयमा पुगेको छ ।

जसपाका एक पदाधिकारीका अनुसार, “हामीले प्रधानमन्त्रीलाई नयाँ मन्त्रीको नाम सिफारिस गरेका थियौँ तर उहाँले समेत तत्काल कदम चाल्नुभएन । मन्त्रीहरूले पनि निर्देशन नटेरेपछि सरकारलाई समर्थन मात्र राख्दै सरकारबाट बाहिरिने निर्णय भएको हो ।”

यसअघि साह र यादवलाई जसपाले १ वर्षका लागि मात्रै मन्त्री पठाएको थियो । उनीहरू १ वर्षभन्दा बढी समयदेखि सरकारमा रहेका छन् । दुई महिना अघिदेखि नै जसपाले मन्त्री फेर्ने तयारी गरे पनि प्रधानमन्त्री ओलीको आलटालका कारण ढिलाइ भएको जसपा नेताहरूको आरोप छ ।

त्यस्तै, महन्थ ठाकुर नेतृत्वको लोसपाले पनि सरकारबाट आफ्ना मन्त्री फिर्ता बोलाउने तयारी गरेको छ । लोसपाबाट शरतसिंह भण्डारी श्रम, रोजगार तथा सामाजिक सुरक्षा मन्त्री रहेका छन् ।

भण्डारीलाई फिर्ता गरी सर्वेन्द्रनाथ शुक्लालाई मन्त्री बनाउने तयारी लोसपाका छ । विगत तीन महिनादेखि मन्त्री हेरफेरका लागि अध्यक्ष ठाकुरले प्रधानमन्त्रीसँग आग्रह गर्दै आए पनि सुनुवाइ नभएको लोसपा नेताहरूको गुनासो छ ।

उनीहरूको आरोपमा प्रधानमन्त्री ओलीले राई र ठाकुर दुवैलाई कमजोर बनाउन दलभित्र खेलिरहेको बताएका छन् ।

हाल ओली नेतृत्वको सरकारमा नेपाली कांग्रेस, नेकपा (एमाले), जसपा (अशोक राई समूह), जनमत पार्टी, नागरिक उन्मुक्ति पार्टी (नाउपा) र लोसपा सहभागी छन् । जनमत पार्टी सङ्घीय सरकारमा सहभागी नभए पनि मधेश प्रदेशमा मुख्यमन्त्री पाएको छ ।