गाम्बियाबाट स्पेन जाँदै गरेको डुंगा पल्टिँदा ६९ आप्रवासीको मृत्यु

काठमाडौं : मौरिटानियाको तटमा आप्रवासी बोकेको डुङ्गा दुर्घटना हुँदा कम्तीमा ६९ जनाको मृत्यु भएको छ भने अझै कैयौँ बेपत्ता रहेका छन्।

मौरिटानियाको तटरक्षकलाई उद्धृत गर्दै बीबीसीले जनाएअनुसार १७ जनाको उद्धार गरिएको छ भने बाँकीको खोजी कार्य जारी छ।

उद्धार भएकामध्येका यात्रुका अनुसार उक्त काठको डुङ्गा दुर्घटनाको ६ दिनअघि गाम्बियाबाट निस्किएको थियो।

डुङ्गामा करिब १६० जना सवार थिए, जसमा धेरैजसो गाम्बिया र सेनेगलका नागरिक रहेका थिए। स्पेनको क्यानरी टापुतर्फ जाँदै गरेको डुङ्गा एट्लान्टिक महासागरमै दुर्घटनामा परेको बताइएको छ।

अफ्रिकी आप्रवासीहरूले युरोप पुग्ने प्रयासमा एट्लान्टिक महासागर पार गर्ने खतरनाक यात्रा पछिल्ला वर्षहरूमा बढ्दै गएको छ।

गत वर्ष मात्रै करिब ४७ हजार आप्रवासी क्यानरी टापु पुगेका थिए। स्पेनी गैरसरकारी संस्था कोमिनान्डो फ्रोन्टेरास को तथ्यांकअनुसार सो अवधिमा ९ हजारभन्दा बढी आप्रवासीले यात्रा क्रममा ज्यान गुमाएका थिए।