झापाका विमली नवप्रवर्तक व्यावसायीका रूपमा पुरस्कृत

झापा । झापाका युवा व्यावसायी प्रज्वल विमली नवप्रवर्तक व्यावसायीका रूपमा पुरस्कृत भएका छन् । सफ्टवेयर उत्पादन कम्पनी ट्याली सोलुसन्स प्रालि, बैंगलोर भारतद्वारा काठमाडौंमा आज आयोजित विशेष कार्यक्रममा विमलीलाई सम्मान गरिएको हो ।

नेपाल एभरेष्ट कार्डमम् प्रोडक्सन एण्ड प्याकेजिङ प्रालिका सञ्चालक विमलीलाई नयाँ पुस्ताका ‘स्टार्टअप’ व्यावसायीका रूपमा पुरस्कृत गरिएको हो । उनलाई ट्याली सोलुसन्स प्रालिका कार्यकारी निर्देशक नुपुर गोयन्का र नेपाल उद्योग वाणिज्य महासङ्घका महानिर्देशक गोकर्णराज अवस्थीले संयुक्त रूपमा सम्मान तथा पुरस्कार प्रदान गरे ।

विमली झापा साइक्लिङ सङ्घका उपाध्यक्ष र नेपाल अलैंची व्यावसायी महासङ्घका केन्द्रीय सदस्यसमेत हुन् । उनी विर्तामोडमा बसेर नयाँ प्रविधि प्रयोग गर्दै व्यावसायिक क्षेत्रमा सक्रिय छन् ।

ट्याली सोलुसन्स प्रालिले प्रत्येक वर्ष विश्वका साना, मझौला तथा सूक्ष्म उद्योगलाई विभिन्न विधामा वर्गीकृत गरी उत्कृष्ट व्यावसायीलाई सम्मान गर्दै आएको छ । यस वर्ष करिब २० हजार आवेदनमध्ये २०० व्यावसायी छनोटमा परेका थिए भने २५ जना नेपाली व्यावसायी पुरस्कृत भएका छन् ।

कोशी प्रदेशका साझेदार कम्पनी ‘आइडियल एकाउन्टिङ सोलुसन्स प्रालि’का सञ्चालक राजनारायण साहका अनुसार यो पुरस्कार साना व्यावसायीलाई प्रवर्द्धन गर्ने उद्देश्यले प्रदान गरिँदै आएको छ ।

यसपटक महिला व्यावसायीमध्ये अनिता तिम्सिना बस्नेत, सङ्गीता कडरिया, सृजना खड्का, सुनिता शेर्पा र सङ्गीता पाण्डेले सम्मान पाएका छन् । त्यस्तै, अनुभवी व्यावसायीका रूपमा डा. रञ्जनकुमार दाहाल, डा. मनिता तिम्सिना, राजेन्द्रबहादुर सिंहलगायत सात जनाले पुरस्कार पाए ।

त्यसैगरी, प्रविधि अपनाएर व्यवसाय गर्ने श्रेणीमा राजु ढकाल, रुपक शाक्य, डा. सुरेशकुमार मानन्धरलगायत पाँच जना पुरस्कृत भए भने सामाजिक प्रभाव पार्ने व्यावसायीका रूपमा मनोजविक्रम शाह, मनोहर कार्की, अञ्जल निरौला, सुमिता राउत र सवलचन्द साहले पुरस्कार पाए ।

कार्यक्रममा ट्याली सोलुसन्स प्रालिका निर्देशक नुपुर गोयन्काले विगत पाँच वर्षदेखि प्रेरणादायी, सफल र उत्कृष्ट व्यावसायीलाई सम्मान गर्दै आएको जानकारी दिए ।