घट्यो डिजेल, मट्टीतेल र हवाई इन्धनको मूल्य

नेपाल आयल निगमले पेट्रोलियम पदार्थको मूल्यमा समायोजन गरेको छ । इण्डियन आयल कर्पोरेशनले मूल्य समायोजन गरेर पठाएको आधारमा निगमले खुद्रा मूल्य हेरफेर गरेको हो ।

निगमका अनुसार डिजेल र मट्टितेल प्रतिलिटरमा ४ रुपैयाँले मूल्य घटेको छ । पेट्रोल र एलपी ग्यासको खुद्रा बिक्री मूल्य भने यथावत रहेको निगमले जनाएको छ ।

यस्तै, हवाई इन्धनमा आन्तरिकतर्फ १ रुपैयाँ घटाइएको छ भने अन्तर्राष्ट्रिय उडानका लागि काठमाडौंमा प्रतिकिलोलिटर ७ अमेरिकी डलरले मूल्य कम गरिएको निगमले जानकारी दिएको छ । पोखरा र भैरहवाबाट हुने अन्तर्राष्ट्रिय उडानका लागि भने ब्रेकइभेन पोइन्ट मूल्य कायम गरिएको छ ।

नयाँ दर आजै राति १२ बजेदेखि लागू हुने निगमले जनाएको छ ।