जनकपुर झडपमा एकजना घाइते, प्रहरी र हिन्दु समुदायबीच तनाव

जनकपुरधाम : धनुषामा हिन्दु समुदाय र प्रहरीबीच भएको झडपमा एकजना नागरिक घाइते भएका छन्। प्रहरीको नियन्त्रण प्रयासका क्रममा लक्ष्मण मुखिया (२९) को दुवै घुँडामा गोली लागेको धनुषाका प्रहरी प्रवक्ता डीएसपी वरुणबहादुर सिंहले जानकारी दिएका छन्। उनी देवपुरा रुपैठाका बासिन्दा हुन् र हाल प्रादेशिक अस्पताल जनकपुरमा उपचाररत छन्।

झडपमा सातजना प्रहरी र केही सर्वसाधारण पनि घाइते भएका छन्। घाइते प्रहरीहरूलाई पनि प्रादेशिक अस्पताल जनकपुरमा उपचार भइरहेको छ।

घटनास्थल जनकपुरधाम उपमहानगरपालिका–२०, देवपुरा रुपैठामा हिजो झण्डाचोकमा रहेको टावरलाईट जडान भएको पोलमा लगाइएको हरियो झण्डा हटाउने क्रममा दुई पक्षबीच झडप भएको थियो। प्रहरीले झडप नियन्त्रणका लागि ११ सेल अश्रु ग्यास प्रहार गरेको थियो।

डीएसपी सिंहका अनुसार आज दुवै पक्षबीच सहमति अनुसार सोचोकमा रहेको दुवै समुदायको झण्डा हटाउने प्रक्रिया चल्दा प्रहरीले गोली र अश्रु ग्यास प्रयोग गरेका थिए। यस घटनापछि स्थानीय क्षेत्रमा तनाव कायम रहेको छ।