मोरङ : सुन्दरहरैँचा–७, गछिया खोलामा निर्माण गर्न लागिएको क्रसरको विषयमा आइतबार अनुगमनमा पुगेका मोरङका प्रमुख जिल्ला अधिकारी (प्रजिअ) इन्द्रदेव यादवले पत्रकारलाई भिडियो खिच्न रोक लगाएका छन् । 

उत्तरी मोरङमा खोला उत्खनन बढ्दो क्रममा रहेको र यसको रिपोर्टिङ गर्दै आएका पत्रकारहरूलाई प्रजिअ यादवले प्रत्यक्ष हस्तक्षेप गरेका हुन् ।

नेपाल पत्रकार महासंघ मोरङका सहसचिव रेवतीरमण निरौला, विराट टेलिभिजन इटहरीका विकल पौडेल, न्यूज २४ का मनोज भुजेल र पूर्वी अनलाइनका कृष्णचन्द्र सुवेदीलाई “भिडियो नबनाउनु” भन्दै रोक लगाइएको थियो । यस घटनापछि प्रेस स्वतन्त्रता र सूचना पहुँचसम्बन्धी गम्भीर प्रश्न उठेको छ ।

गछिया र बूढी खोलाबाट चरम दोहन भइरहेको समाचार प्रदेश खबरसहितका सञ्चारमाध्यमहरूले छापिरहेका छन् । 

यो पनि :-  मोरङको सुन्दरहरैँचामा बूढी र गछिया खोलाको चरम दोहन, जोडिए मेयरदेखि कर्मचारीसम्मै

सुन्दरहरैँचा नगरपालिकाले समेत प्रक्रिया र पारदर्शितामा बेवास्ता गर्दै ठेक्का जारी गरिरहँदा गत आर्थिक वर्षमा गछिया खोलामा १२ नाकाबाट १,२१७३३ दशमलव ९ घन मिटर र बूढी खोलामा ४ नाकाबाट ३०,८३६ दशमलव ६२ घन मिटर उत्खननको अनुमति भए पनि सम्झौताभन्दा धेरै उत्खनन भइरहेको गुनासो बढेको थियो ।