पहिचानवादी कार्यकर्ता र प्रहरीबीच विराटनगरमा झडप

विराटनगर । विराटनगरमा पहिचानवादी संगठनका कार्यकर्ता र प्रहरीबीच शनिबार झडप भएको छ । कोशी नाम खारेजी माग गर्दै भएको आन्दोलनका क्रममा घाइते भएर निधन भएका पदम लिम्बू लाजेहाङको शव प्रदर्शन गर्ने क्रममा रोडशेषमा झडप भएको हो । चैत ५ गते विराटनगरमा भएको प्रदर्शनका क्रममा प्रहरी र आन्दोलनकारीबीच झडप भएको थियो । झडपमा परी लाजेहाङको टाउकोमा चोट लागेको थियो । उनलाई चैत ८ गते धरानस्थित विपी कोइराला स्वास्थ्य विज्ञान प्रतिष्ठानमा उपचारका लागि भर्ना गरिएको थियो । उपचारका क्रममा उनको १० गते उनको मृत्यु भएको थियो । लाजेहाङलाई संघीय सरकारले सहिद घोषणा गर्ने र उनको परिवारलाई क्षतिपूर्ति दिने निर्णय गरेको छ । कोशी प्रदेश सरकारले पनि उनको परिवारलाई ३ लाख रुपैयाँ क्षतिपूर्ति दिने निर्णय गरेको छ । संघर्ष समितिले भने प्रदेशको नाम कोशी खारेज नगरेसम्म शव उठाउन नदिने बताउँदै आएका थिए । एक महिनापछि लाजेहाङको अन्त्येष्टि गर्न सहमति जुटेको थियो । लाजेहाङको अन्त्येष्टि गर्नुअघि धरानमा, इटहरी, विराटनगरको रोडशेष चोकमा श्रद्धाञ्जली अर्पण तथा श्रद्धाञ्जली सभा गर्ने र कोशी प्रदेशसभा परिक्रमा गराउने कार्यक्रम थियो । विराटनगरमा शवसहित प्रदर्शन गर्ने क्रममा क्रममा झडप भएको हो । झडपका क्रममा केही घाइते भएको बताइए पनि विस्तृतमा केही खुलाइएको छैन ।