नेकपा एमालेको ११ औँ महाधिवेशन: नेतृत्व चयनका लागि मतदान सुरु

काठमाडौँ : नेकपा (एमाले) को ११ औँ महाधिवेशनमा नयाँ नेतृत्व चयनका लागि मतदान प्रक्रिया औपचारिक रूपमा सुरु भएको छ।

अध्यक्ष पदका उम्मेदवारद्वय केपी शर्मा ओली र ईश्वर पोखरेलले पहिलो मतदान गर्दै निर्वाचनको सुरुवात गरेका हुन्। पूर्व निर्धारित समयभन्दा केही ढिलो गरी बिहान ९:३० बजेबाट मात्रै मतदान सुरु भए पनि अहिले मतदान स्थलमा नेता तथा कार्यकर्ताहरूको उत्साहजनक उपस्थिति र लामो लाइन देखिएको छ।

ढिलाइ र प्राविधिक तयारी यसअघि मंगलबार नै मतदान गर्ने कार्यतालिका रहे तापनि केही प्राविधिक कारणले गर्दा निर्वाचन प्रक्रिया आजका लागि सारिएको थियो।

हिजो साँझ मतदानको प्रतीक्षामा रहेका प्रतिनिधिहरूलाई राति ८ बजे मात्रै आजका लागि मतदान तय गरिएको जानकारी दिँदै फर्काइएको थियो। आज बिहान पनि तोकिएको समय ८ बजेभन्दा करिब डेढ घण्टा ढिलो गरी मात्रै मत खसाल्न सुरु गरिएको हो।

चुनावी प्रतिस्पर्धा र माहोल यस पटकको महाधिवेशनमा अध्यक्ष पदका लागि वर्तमान अध्यक्ष केपी शर्मा ओली र वरिष्ठ उपाध्यक्ष ईश्वर पोखरेल चुनावी मैदानमा हुनुहुन्छ।

देशभरबाट छानिएर आएका २ हजार २६३ जना प्रतिनिधिहरूले अध्यक्षदेखि केन्द्रीय सदस्यसम्मका पदहरूमा आफ्नो मताधिकार प्रयोग गर्नेछन्। दुवै नेताहरूले आ-आफ्नो प्यानलसहित प्रतिस्पर्धा गरिरहेका कारण मतदान स्थल वरपर समर्थकहरूको नाराबाजी र चुनावी प्रचारले वातावरण निकै तातिएको छ।

मतदानपछिको प्रक्रिया मतदान सम्पन्न भएलगत्तै मतगणनाको तयारी गरिने र नतिजा छिट्टै सार्वजनिक गर्ने पार्टीको लक्ष्य छ।