बिराटनगर महानगरपालिका पुर्वाधार विकाससँगै सुन्दर नगरी शहरको परिकल्पनाका साथ अभियानमा छ । विराटनगरलाई डुबानबाट मुक्त गराउन सम्भाव्यता अध्ययन सुरु गरेको विराटनगर महानगरपालिकाले महानगर क्षेत्रमा निर्माण गरिएका अवैध संरचना हटाउने अभियान,सडकपेटी सरसफाइ अभियान लगायतलाई सार्थकता दिइरहेको छ ।
मेयर नागेश कोइरालाको घरमा डोजर चलाएर अवैध संरचना हटाउन सुरु गरेको महानगरपालिका महानगरलाई सुन्दर बनाउने अभियानमा छ ।
सोही अभियान अन्तर्गत विराटनगर–४ मा रहेको एयरपोर्ट रोडलाई नमुना सडक बनाउने उद्देश्यका साथ सरसफाई गरिएको छ । फोहोर हुँदा विमानबाट विराटनगर आउने आगन्तुकमा नकारात्मक असर पर्ने भएकाले सरसफाई गरिएको महानगरले जनाएको छ ।
सरसफाईसँगै सडक छेउछाउ बनाइएका अवैध संरचनासमेत हटाइएको वडा नम्बर ४ का वडाध्यक्ष जितेन थापाले जानकारी दिए । उनले महानगरका मेयर नागेश कोइरालाको नेतृत्वमा १९ वटै वडामा सरसफाई जारी रहेको र सोही अभियानअन्तर्गत एयरपोर्ट रोड सफा गरेको बताएका छन् ।
“यो रोड सफा राख्दा विमानबाट आउने आगन्तुकमा विराटनगरप्रति सकारात्मक प्रभाव पर्छ,” उनले भने, “मेयर साबको नेतृत्वमा १९ वटै वडामा सरसफाई अभियान जारी छ । सो अभियानअन्तर्गत आज यो रोड सफा गरेका हौं ।” सडकमा रहेका फोहोर र धुलो सफा गर्नुका साथै दमकल प्रयोग गरेर सडकलाई पखालिएको थियो ।
सरफाई अभियानमा महानगरका प्रमुख प्रशासकीय अधिकृत विष्णुप्रसाद कोइराला, वडा सदस्यहरुको समेत उपस्थिति रहेको थियो । धरानरोडदेखि एयरपोर्ट गेटसम्म सफाई गरिएको थियो ।
महानगरले सुरु गरेको अभियानका कारण स्थानीयसमेत हर्षित भएका छन् । रोडको सौन्दर्यकरण अभियान अन्तर्गत बिभिन्न स्थानमा सडक बत्ती लगाउने, टायल विछ्याउने लगायतका पुर्र्वाधार बिकासका कामहरुले समेत गति लिइरहेको छ ।
Discussion about this post