धरानको बस्तीमा सुरक्षा गर्न ‘नागरिक सुरक्षा टोली’ परिचालन, अपराधिक घटनामा कमि

धरान । धरान उपमहानगरपालिका वडा नं. ५ स्थित देउराली बस्तीमा सुरक्षा गर्नकालागी ‘नागरिक सुरक्षा टोली’ परिचालन गरिएको छ । कोशी प्रदेशकै सबैभन्दा ठूलो र धेरै अव्यवस्थित बसोबास रहेको देउरालीमा विभिन्न आपराधिक घटना रोक्न तथा चाडबाडका बेला चोरी डकैती रोक्नकालागी नागरिक सुरक्षा टोली परिचालन गरिएको हो । देउरालीका प्रत्येक घरबाट एक जनाका दरले बेलुकी ८ बजेदेखि रातभर सुरक्षा टोली खटिइरहेको छ । विगत एक महिनादेखि सुरु गरिएको सुरक्षा गस्तिलाई व्यवस्थित गर्न टोल विकास संस्थाहरुलाई जिम्मेवारी दिइएको धरान उपमहानगरपालिका ५ नं. वडाका वडाध्यक्ष मनप्रसाद लिम्बूले बताए । उनका अनुसार ५ नं. वडाका विभिन्न संघ संस्था, अस्थायी प्रहरी चौकी देउराली र वडा कार्यालयको समन्वयमा गस्ति टोली परिचालन गरिएको हो । ३ वटा टोल विकास संस्थाबाट सुरु गरिएको रात्रिकालिन नागरिक सुरक्षा गस्तीलाई अहिले विस्तार गरिएको छ । वडा सदस्य विजय राईका अनुसार सामुदायिक टोल विकास संस्था तल्लो देउराली, समानता टोल विकास संस्था फोक्लेन टापु, नमुना टोल विकास संस्था तल्लो देउराली, खैरेनी टोल विकास संस्था खैरेनी, त्रिवेणी टोल विकास संस्था देउराली चोक, पञ्चमुखी टोल विकास संस्था बगरकोट वारी र चेतना टोल विकास संस्था झोरापाटाले रात्रिकालिन गस्ति गरिरहेका छन् । गस्ति सुरु गरेपछि आपराधिक घटना तथा चोरीका घटनामा उल्लेखनिय रुपमा कमि भएको इलाका प्रहरी कार्यालयका डिएसपी नवराज मल्लले बताए । उनका अनुसार समुदाय स्तरमा टोली गठन गरी नियमित रात्रिकालिन गस्ति सुरु गरेपछि त्यसले राम्रो प्रतिफल प्राप्त गरेको छ । अव्यवस्थित बसोबास रहेको क्षेत्र भएकोले विगतमा चोरी तथा अन्य घटना धेरै हुने गरेको थियो । तर यस पटक भने त्यस्ता घटनामा कमि आएको डिएसपी मल्ले जानकारी दिएका छन् । उनले भने –‘अहिले धरानको ५ नं. वडामा नियमित रुपमा रात्रिकालिन गस्तिका कारण घटनाहरु कमि भएको छ भने ११ नं. वडा र १६ नं. वडामा पनि रात्रिकालिन गस्ति सुरु भएको छ ।