बेलासेमा सोलार पम्पिङबाट सिचाई

इलाम, कात्तिक : इलाम नगरपालिकाको ११ नम्बर वडामा रहेको बेलासे गाउँमा सोलार प्रविधिबाट सिंचाई आयोजना निर्माण सम्पन्न भएको छ । माइखोलाको पानीलाई सोलारको माध्यमबाट पम्पिङ गरी एक सय ३० मिटर माथि डाँडामा तानिएको छ । प्रति सेकेण्ड दश लिटर पानी तानेर बेलासे गाउँमा सिंचाई सुविधा उपलव्ध भएको छ । स्थानीय पहलका लागि क्यानडा कोषको सहयोगमा नामसालिङ सामुदायिक विकास केन्द्र इलामले बेलासेमा जलवायु अनुकुलन सम्बन्धि परियोजना शुरु गरेको हो । ३० लाख लागतमा परियोजना अन्तर्गत सोलार पम्पिङ अन्तर्गत सिंचाई आयोजना सम्पन्न भएको हो । आयोजना इलाम नगरपालिकाको साझेदारीमा सम्पन्न भएको हो । नासाविकेका इञ्जिनियर घनेन्द्र भण्डारीका अनुसार बेलासेको बाँझो जमिनमा सिचाई गरेर जलवायु अनुकुलित खेती प्रवद्र्धन गर्न संस्थाले पहल गरेको हो ।   कुल ६५ लाख ४५ हजार ६ सय ३६ लागतमा संचालन हुने परियोजनामा जलवायु प्रभावको बारेमा सचेतना, जलवायु अनुकुलन खेती प्रणाली र जलवायु अनुकुलन गाउँको योजना निर्माण गरिएकोे छ । परियोजनाबाट स्थानीय क्षेत्रका ५० घर परिवार लाभान्वित भएका छन् ।