५० रुपैयाँका दरले उठाएर स्थापना भएको शान्ति सहकारीको सफलता

इटहरी / ५० रुपैयाँका दरले दुई हजार तीन सय रुपैयाँ सेयर सङ्कलन गरी ३० वर्ष अघि स्थापना भएको शान्तिजनकल्याण बहुउद्देश्यीय सहकारी संस्थाको सेयर रकम अहिले ७ करोड ७५ लाख ३१ हजार ५ सय पुगेको छ । ४६ जना सेयर सदस्यहरू जम्मा भएर सुरुवात गरिएको सहकारीमा हाल एक हजार आठ सय ४९ जना सेयर सदस्यहरू रहेका छन् । इटहरी २ शान्तिनगरमा २०४९ साल फागुन ९ गते चन्द्रप्रसाद रेग्मीको घरमा परिकल्पना भएको सहकारी आज तरहरामा आइपुग्दा ८ जना अध्यक्षहरू परिवर्तन भइसकेका छन् । परिकल्पना गर्दा टङ्क थापाको अध्यक्षतामा शान्ति जनकल्याण कोषको रूपमा सहकारीले आफ्नो गतिविधि गरेपनि २०५२ साल फागुन ८ गते सहकारी प्रशिक्षण तथा डिभिजन कार्यालय सुनसरीमा बिधिबत दर्ता भई सञ्चालन भएको थियो । तत्कालीन समयमा कमलबहादुर कार्कीलाई दर्ता गर्दा अध्यक्ष बनाएर सञ्चालनमा आएको सहकारी त्यसबेला सेयर सदस्यकै शरणमा रहँदै आएको थियो । त्यसपछि सहकारीको अध्यक्षमा टीकाप्रसाद ओझा चयन भएपछि तत्कालीन हाँसपोसा गाविस वडा नम्बर २ तरहरामा कार्यालय स्थापना गरी सहकारीले कारोबार सुरु गरेको थियो । अत्यन्तै दुःख र कष्टका साथ स्थापना भएको सहकारीको यस वर्ष ५४ करोड ४५ लाख ८४ हजार ४ सय ९५ रुपैयाँ ८६ पैसाको वासलात प्रतिवेदनमा उल्लेख गरेको छ । शनिबार सहकारीले २८ औँ साधारणसभा सम्पन्न गरेको छ । पछिल्लो समयमा डिजिटल कारोबार बढेसँगै संस्थाले पनि प्रविधिमैत्री बनाउँदै लैजानका लागि आगामी चैत्र महिनादेखि संस्थालाई पूर्ण रूपमा डिजिटल कारोबार सुरु गर्न लागेको संस्थाका उपाध्यक्ष एव ऋण उपसमितिका संयोजक चिन्तामणी सापकोटाले बताए । बजारमा सहकारीहरूमा दिनप्रतिदिन जोखिम बढ्दै गइरहेकोप्रति चनाखो बन्दै ऋण असुलीमा थप कडाइ गर्दे सेयर सदस्यहरूलाई वित्तीय साक्षरता सम्बन्धी अनुशिक्षण कार्यक्रमहरूसमेत सञ्चालन गर्दे आएको संस्थाका कर्मचारी चुडामणि नेपालले  बताए ।

संस्थाका अध्यक्ष वीरबहादुर लिम्बूले संस्थाको रणनीतिक र व्यावसायिक योजना तयार गरी प्रविधिमैत्री बनाउँदै अगाडि बढाउनका निम्ति आफूहरू व्यवस्थित ढङ्गबाट लागि परेको बताए । यसैवर्षमा सेवा केन्द्र समेत सञ्चालन गर्ने योजना गर्दे तोरीको तेल, बेसार लगायतका बस्तुहरू उत्पादन गरेर व्यवसाय गर्ने योजना रहेको उनको भनाइ छ ।

साधारणसभामा एक दर्जन बढीलाई सम्मान शान्ति जनकल्याण बहुउद्देश्यीय सहकारी संस्थाले आफ्नो २८ औँ साधारणसभाका अवसरमा एक दर्जन बढिलाई सम्मान गरेको छ । कृषि निर्देशनालय तरहरामा भएको साधारणसभामा १० जना सेयर सदस्य बृद्धबृद्धाहरूलाई सम्मान गरिएको हो । सम्मानित हुनेहरूमा इन्द्रलाल अधिकारी, पुष्प गुरुङ, फूलमाया कार्की, युवकुमारी कार्की, सीता काफ्ले, लक्ष्मीप्रसाद कोइराला, नरेशकुमार श्रेष्ठ, डम्बरकुमारी गिरीलगायत छन् । कार्यक्रमका प्रमुख अतिथि राष्ट्रिय सहकारी बैङ्कका पूर्व अध्यक्ष तथा राष्ट्रिय सहकारी महासङ्घका उपाध्यक्ष रमेशप्रसाद पोखरेलm संस्थाका अध्यक्ष लिम्बूले दोसल्ला ओढाएर पौष्टिक आहारसहित सम्मानपत्रद्धारा सम्मान गरे । यस्तै संस्थाका उत्कृष्ट कर्मचारीका रूपमा कृष्णकुमारी पोखरेललाई नगदसहित पुरस्कृत गरिएको छ । यस्तै, उत्कृष्ट ऋणीका रूपमा मेघराज पराजुली र शान्तिकुमारी राईलाई सम्मान गरिएको छ । यस्तै, उत्कृष्ट बचतकर्ताका रूपमा रमण गुरुङ र तारा काफ्लेलाई पनि सम्मान गरिएको छ । यस्तै, कोप मार्टमार्फत उत्कृष्ट खरिदकर्ताका रूपमा सनम राई र राधा राईलाई सम्मान गरिएको छ । प्लस टु मा उत्कृष्ट अङ्क ल्याउने २ जना छात्र छात्रालाई पनि नगद तथा प्रमाणपत्र सहित पुरस्कृत गरिएको छ । साधारणसभामा संस्थाका लेखा समिति संयोजक कृष्णप्रसाद घिमिरेले आर्थिक प्रतिवेदन प्रस्तुत गरेका थिए भने अध्यक्ष प्रतिवेदन संस्थाका अध्यक्ष लिम्बूले प्रस्तुत गरेका थिए । कार्यक्रममा प्रमुख अतिथिका रूपमा रहेका पोखरेलले सहकारी क्षेत्रमा पछिल्लो समयमा केही खराब व्यक्तिका कारण चुनौती थपिँदै गएको बताए ।

उनले सहकारी ऐन र नियमलाई नमानी जथाभाबी रूपमा सहकारी सञ्चालन गर्ने प्रवृत्ति बढ्दै गएकाले पनि यस क्षेत्रमा चुनौती थपिँदै गएको बताए । सहकारी नियम पालना गरी सञ्चालनमा रहेको सहकारीहरूमा कुनै समस्या नरहेको उनको भनाइ छ ।

कार्यक्रममा जिल्ला सहकारी सङ्घ सुनसरीका अध्यक्ष गङ्गाप्रसाद दाहाल, जिल्ला बहुउद्देश्यीय सङ्घ सुनसरीका अध्यक्ष गुणराज काफ्ले, इटहरी उपमहानगरपालिकाका वडा नम्बर २० का वडाध्यक्ष मणिराम श्रेष्ठ, इटहरी २ का वडाध्यक्ष माधव कोइराला, पूर्व अध्यक्षहरू खेमराज दाहाल, टीकाप्रसाद ओझा, कृषि निर्देशनालयका प्रमुख डा।गोविन्द तिम्सिना लगायतले बोलेका थिए । संस्थामा हाल हाल ३८ करोड ६३ लाख ६० हजार २ सय ८० निक्षेप रहेको छ । ३४ करोड १७ लाख ९५ हजार २ सय २५ ऋण लगानी रहेको छ । संस्थाले आर्थिक वर्ष २०७९/८० मा १ करोड २६ लाख ८९ हजार ३ सय ४२ रुपैयाँ नाफा कमाउन सफल भएको प्रतिवेदनमा उल्लेख गरेको छ ।