झापाका क्यासिनोमा खुलेआम यौन धन्दा, प्रहरी समेतको मिलेमतो

बिर्तामोड। झापामा सञ्चालित ठूला होटल तथा क्यासिनो नयाँ आवरणमा यौन अखडा बन्दासमेत प्रशासन मुकदर्शक भएको भन्दै नेपाल कम्युनिष्ट पार्टी बिप्लब समूहले आपत्ति जनाएको छ । पार्टीका मेची ब्यूरो इञ्चार्ज सुमन सिंह सीले विज्ञप्ति जारी गर्दै झापामा खोलिएका तारे होटल तथा क्यासिनोमा नयाँ आवरणमा वेश्यालय सञ्चालन गरेको भन्दै यस्तो कार्य रोक्न आग्रह गरेका छन् । मुलुक गम्भीर मोडमा पुगेको र राष्ट्रिय स्वतन्त्र तथा जनजीवनमाथि भयानक षडयन्त्र भइरहेका बेला झापामा क्यासिनोको नाममा नेपालीलाई प्रवेश गराई खुलेआम रुपमा जुवाजन्य खेल खेलाई रहेको र गरीव तथा अवोध नेपाली चेलीहरुलाई मनोरञ्जनका लागि प्रयोग गर्ने गरेको भन्दै यस्तो कार्य रोक्न उनले आग्रह गरेका छन् । कालो धनलाई वैध बनाउन खुलेका तारे होटलमा नेपालका व्यवसायीहरुको पुँजी दिनहुँ लुट्दा समेत प्रहरी मुकदर्शक बनेको भन्दै सीले क्यासिनोको नाममा हुने अवैध गतिविधि रोक्न चेतावनीपूर्ण विज्ञप्ति जारी गरेका छन् । साना, ठूला होटलसहित तारे होटलमा हुँदै आएका कुकृत्य नरोके संघर्षका कार्यक्रमहरु रोक्न आफू पछि नहट्ने विज्ञप्तिमा उल्लेख गरिएको छ । तारे होटल र क्यासिनोबाट ठगीमा परेका स्थानीय व्यापारीहरुले दिनानुदिन गुनासो गर्दै आएको र नेपाली चेलीबेटीको मोलमोलाइ र व्यापारपछि झापाका स्थानीय बजारमा भइरहेका छलफल, वित्तीय क्षेत्रमा क्यासिनोका कारण भयानक असर परेको विज्ञप्तिमा उल्लेख छ । क्यासिनोमार्फत नेपाली पुँजी पलायन भइरहेको भन्दै त्यसलाई रोक्न सरकार गम्भीर हुनु पर्ने विज्ञप्तिमा उल्लेख छ । चेलीबेटीको मोलमोलाई र यौनजन्य गतिविधिमा सम्लग्न गराई सिंगो झापा र झापाली लज्जित हुनबाट जोगाउन विज्ञप्तिमार्फत आग्रह गरिएको छ । झापामा खुलेका तारे होटल र अन्य साना ठूला होटलमा हुने गरेका अवैध गतिविधि आफैंमा निन्दनीय भएको र यसलाई रोक्न झापाका राजनीतिक दल, नागरिक समाज, प्रहरी प्रशासन, सरोकारवाला निकाय सबै लाग्नु पर्ने सीद्वारा जारी विज्ञप्तिमा उल्लेख छ । नेपाली चेलीबेटीलाई खेलौनाको रुपमा प्रयोग गर्दै आएको कार्य पार्टीका लागि स्वीकार्य नरेको उल्लेख गर्दै यस्तो कुकृत्य तत्काल बन्द गर्न समेत होटल सञ्चालकलाई चेतावनी दिइएको छ । झापामा दुईवटा पाँचतारे होटल सञ्चालनमा छन् । योसँगै अन्य दुईवटा होटलसमेत निर्माणाधीन रहेका छन् । हाल बिर्तामोड र मेचीनगरमा सञ्चालनमा रहेका दुबै तारे होटलमा खुलेआम रुपमा नेपालीले क्यासिनोमा प्रवेश गर्ने गरेको बताइएको छ । क्यासिनोमा नेपाली व्यवसायी लुटिँदा समेत स्थानीय प्रशासन मौन रहेको भन्दै पार्टीको गम्भीर ध्यानाकर्षण भएको विज्ञप्तिमा उल्लेख छ । विदेशी जुवाडेलाई क्यासिनो ठेक्कामा दिने र नेपालीलाई जुवाजन्य खेल खेलाएर टाट पल्टाएपछि व्यवसायीहरु सडकमा रुँदै हिँडेको स्थितिमा समेत प्रशासन मुकदर्शक बन्नु आफैंमा दुःखद हो भन्दै विज्ञप्तिमा यस्तो हुन नदिन सबैलाई आग्रह गरिएको छ । तारे होटलमा हुने जुवाजन्य खेल लामो समयदेखि निर्वाधरुपमा खेलाइँदा समेत प्रशासन मुकदर्शक बन्नुले उनीहरुको समेत संलग्नता रहन सक्ने आशंका गरिएको छ । स्रोतका अनुसार दलका ठूला नेता र पहुँचवाला व्यक्तिलाई होटलले नजराना बुझाउने गरेको बताइएको छ । कतिपयलाई होटलले खाने र बस्नेको प्रवन्ध मिलाई दिएकाले तारे होटलमा हुने गरेका कुकृत्य बाहिर आउन नसकेको स्रोतको भनाइ छ ।