प्रदेश १ प्रहरी कार्यालयको नयाँ भवन-मन्त्री हुँदा बजेट विनियोजन, मुख्यमन्त्री भएपछि उद्घाटन

विराटनगर । प्रदेश १ सरकारले निर्माण गरिदिएको प्रदेश प्रहरी कार्यालय भवनको बिहीबार उद्घाटन गरिएको छ । आन्तरिक मामिला तथा कानुन मन्त्रालयले विनियोजन गरेको बजेटबाट प्रदेश राजधानी विराटनगरको रानीमा प्रदेश प्रहरी कार्यालयको नयाँ भवन बनेको हो । भवनको मुख्यमन्त्री हिक्मतकुमार कार्कीले उद्घाटन गरेका हुन् । प्रदेश प्रहरी कार्यालयका अनुसार कार्की प्रदेशको आन्तरिक मामिला तथा कानुनमन्त्री हुँदा प्रदेश सरकारले भवन बनाउन बजेट विनियोजन गरेको थियो । अहिले मुख्यमन्त्रीको हैसियतमा प्रमुख अतिथी बनेर नवनिर्मित भवनको उद्घाटन गर्न उनैले पाएका हुन् । कार्कीले प्रहरीलाई सेवा प्रवाहमा भौतिक पूर्वाधारको अभाव र अपर्याप्तताले प्रत्यक्ष असर परिरहेको बताए । ‘नवनिर्मित भवनबाट सेवा प्रवाह प्रभावकारी हुने विश्वास लिएको छु,’ उनले भने, ‘सुरक्षाकर्मी सुरक्षित भए मात्रै आमनागरिकले सुरक्षाको प्रत्याभूति गर्न पाउँछन् ।’ सुरक्षाको सवालमा प्रदेश सरकार गम्भीर रहेको उल्लेख कार्कीले सुरक्षाकर्मीलाई भौतिकदेखि लिएर सबै हिसाबले सुविधा सम्पन्न बनाउन प्रदेश सरकारले सक्दो सहयोग गर्ने बताए । प्रदेशभरि प्रहरीको कमाण्ड सम्हाल्दै आएको कार्यालयको भवन निर्माण २०७६ सालबाट सुरु भएको थियो । भवन निर्माणमा १९ करोड १४ लाख १ हजार ६ सय ६३ रूपैयाँ खर्च भएको प्रदेश प्रहरी कार्यालयका प्रहरी उपरीक्षक (एसपी) अनिल रानाले जानकारी दिए । साना र ठूला गरेर ७५ वटा कोठा भएको ५ तले भवन निर्माण भएको उनले बताए । प्रदेश प्रहरी प्रमुख प्रहरी नायव महानिरीक्षक (डीआईजी) श्यामलाल ज्ञवालीका अनुसार सुविधा सम्पन्न भवन बनेपछि सेवाप्रवाह सहज भएको छ । कोठाहरु पर्याप्त भएकाले नयाँ भवन बनेपछि काम कारबाहीमा सहजता आएको उनको भनाइ छ । ज्ञवालीले भौतिक हिसाबले सम्पन्न हुँदा कार्यक्षेत्रमा अनकूल वातावरण सिर्जना भइ प्रहरीलाई थप उर्जा तथा जोशका साथ काम गर्न प्रेरणा मिल्ने उल्लेख गरे । पहिलेको भवन साँघुरो, पुरानो र जीर्ण हुँदा कार्यसम्पादन एवं सेवा प्रवाहमा समस्या भइरहेको थियो । नवनिर्मित भवन उद्घाटन समारोहलाई सम्बोधन गर्दै नेपाल प्रहरीका महानिरीक्षक (आईजीपी) धीरजप्रताव सिंहले शान्ति सुरक्षा सबैको साझा जिम्मेवारी रहेको बताए । उनले प्रदेश सरकारको सहयोगबाट नयाँ भवन निर्माण भएर कार्यसम्पादन सहज बनेसँगै प्रहरी कर्मचारीको मनोवल उच्च भएको उल्लेख गरे । प्रहरीबाट प्रदान हुने सेवा समयानुसार स्तरीय हुँदै जाने धारणा राख्दै सिंहले कानुनको परिधिमा रहेर नागरिकमैत्री सेवाप्रवाह गर्न प्रहरीलाई निर्देशन दिए । नवनिर्मित भवन उद्घाटनका अवसरमा भवन निर्माणका लागि उल्लेख्य योगदान पु¥याउने निर्माण कम्पनीसहित प्रदेश प्रहरी कार्यालयमा कार्यरत प्रहरी निरीक्षक (इन्सपेक्टर)हरु ढुण्डीराज गिरी र महेश भट्टराईलाई सम्मानसमेत गरिएको छ । उनीहरुलाई मुख्यमन्त्री कार्कीले प्रशंसा पत्रले सम्मान गरेका हुन् । कार्यक्रममा उच्च अदालत विराटनगरका मुख्य न्यायाधीश सत्यमोहन जोशी थारु, प्रदेशका सडक पूर्वाधार तथा सहरी विकासमन्त्री दुर्गाप्रसाद चापागाईं, उद्योग, कृषि तथा सहकारीमन्त्री भक्तिप्रसाद सिटौला, पर्यटन, वन तथा वातावरण मन्त्री जीवन आचार्य, सामाजिक विकासमन्त्री बुद्धिकुमार राजभण्डारी, स्वास्थ्य मन्त्री निर्मला लिम्बू, मोरङका प्रमुख जिल्ला अधिकारी तीर्थराज भट्टराई, जनप्रतिनिधि, प्रहरी अधिकारीहरु, उद्योगी व्यवसायीलगायतको सहभागिता रहेको थियो ।