निजी क्षेत्रको समस्या समाधान गरेर अर्थतन्त्रको दबाबबाट बाहिर निस्कनुपर्छ : अर्थमन्त्री पौडेल

काठमाडौं : उपप्रधानमन्त्री एवं अर्थमन्त्री विष्णुप्रसाद पौडेलसँग कार्पेट व्यवसायीहरूले भेटवार्ता गरेका छन् । आइतबार अर्थ मन्त्रालयको सुवर्ण हलमा अर्थमन्त्रीसँग कार्पेट व्यवसायीहरूले भेटवार्ता गरेका हुन् । सो अवसरमा अर्थमन्त्री पौडेलले सरकार अर्थतन्त्रबाट दबाब र शिथिलताको अवस्थामा रहेको भन्दै शिथिलताको अवस्थाबाट बाहिर निकाल्न निजी क्षेत्रको समस्या समाधान गर्नुपर्ने बताए । उनले कार्पेट व्यवसायीहरूको अभिव्यक्ति र भोग्नुपरेको समस्याप्रति सरकार गम्भीर रहेको भन्दै यस विषयमा सरकारले छलफल गर्नेे विश्वास दिलाए । उनले भने, ‘अहिले सरकार अर्थतन्त्रबाट जुन प्रकारको दबाबमा छ । जुन प्रकारको शिथिलताको अवस्था छ । यो शिथिलताको अवस्थाबाट बाहिर निकाल्नुपर्छ । यसका निम्ति निजी क्षेत्रको समस्या सुन्नुपर्छ समाधान गर्नुपर्छ अनिमात्रै मनोबल बढ्छ भन्ने कुरा सोचिरहेको छौं । म आग्रह गर्छु तपाईँहरूले दिनुभएको अभिव्यक्ति तपाईंहरुले भोग्नुपरेको समस्याप्रति सरकार गम्भीर छ । यसलाई हामी छलफलको विषय बनाउने छौं । ’ उनले समस्या समाधानभन्दा अगाडि समस्या के हो भनेर बुझ्न जरूरी रहेको बताएका छन् । मन्त्री पौडेलले समस्या के हो बुझ्नका लागि सम्बन्धित क्षेत्रका सदस्यहरूसँग समन्वय हुनुपर्नेमा जोड दिए । उनले भने, ‘समस्या समाधान भन्दा अगाडि समस्या के हो भनेर बुझ्नुपर्छ, समस्या के हो बुझ्नका लागि सम्बन्धित क्षेत्रका सदस्यहरूसँग समन्वय हुनुपर्छ ।’