उर्लाबारीमा पसल फोडेर ३ करोड भन्दा बढीको मोबाइल चोरी

विराटनगर । मोरङको उर्लाबारीमा पसल फोडेर ३ करोडभन्दा बढीको मोबाइल चोरी भएको छ । प्रहरीका अनुसार चोरीमा संलग्नले पसल नै रित्याइदिएको पाइएको छ । पसलमा महँगो मूल्य पर्ने मोबाइलहरू थिए । उर्लाबारी नगरपालिका–७ का योगराज कार्कीले उर्लाबारी–५ मा सञ्चालन गरेको मोबाइल वर्ल्ड नामक पसलमा चोरी भएको मोरङ प्रहरीका प्रवक्ता डिएसपी वेदप्रकाश जोशीले जानकारी दिए । उनका अनुसार पसल खोल्न जाँदा सटर फुटाएर चोरी गरेको देखेपछि कार्कीले प्रहरीलाई सोमबार बिहान ९ बजेतिर घटनाको जानकारी गराएका हुन् । मोबाइल पसल पूर्व–पश्चिम राजमार्गसँगै जोडिएको थियो । मोबाइल पसलमा सोमबार बिहानका राति चोरी भएको प्रहरीले जनाएको छ । तर, चोरीमा संलग्नको पहिचान हुन नसकेको उनको भनाइ छ । ‘चोरीको प्रकृति हेर्दा ठुलै गिरोह संलग्न रहेको अनुमान छ । पसलमा महँगा मोबाइलहरू रहेछन् । सबै मोबाइल चोरी भएका छन् । सटरको ताला फुटाएर चोरी गरिएको छ । चोरीमा संलग्नको पहिचान भइसकेको छैन । विभिन्न कोणबाट अनुसन्धान अघि बढाएर घटनामा संलग्नको खोजी तीव्र पारिएको छ,’ जोशीले भने । पसल सञ्चालकले ३ करोड मूल्य बढीको मोबाइलहरू पसलबाट चोरी भएको जानकारी प्रहरीलाई दिएका छन् । उर्लाबारी–७ घर भएका कार्कीका अनुसार आई फोन, रेडमी, ओपोलगायत विभिन्न ब्रान्डका ४ सय ५० भन्दा बढी मोबाइलहरू पसलमा राखिएको थियो । पसलमा रहेका मोबाइलको सङ्ख्या यकिन नभएको उनले बताए । ‘पसलमा कति वटा मोबाइल थिए भनेर काम गर्नेहरूलाई थाहा छ । मलाई त्यो थाहा हुन सकेन । तर, ४ सय ५० वटाभन्दा धेरै नै थिए । ३ करोडभन्दा बढी मूल्य बराबरको चोरी भएको छ । पसलमा राखिएको नगद पनि चोरी भयो,’ कार्की भन्छन् । यद्यपि, चोरी भएका मोबाइलको सङ्ख्या र मूल्य प्रहरीले यकिन गर्न सकिरहेको छैन । डिएसपी जोशीका अनुसार एउटै मोबाइल २ लाख मूल्यसम्मका रहेको पाइएको छ । ‘जम्मा ३ करोड मूल्य माथिका ४ सय ५० वटाभन्दा बढी मोबाइल थिए भनेर पसल सञ्चालकले प्रहरीलाई जानकारी दिनु भएको छ,’ उनी भन्छन्, ‘प्रहरीबाट सङ्ख्या र मूल्य यकिन गर्ने काम भइरहेको छ ।’ मोबाइलको सङ्ख्या र मूल्य यकिन नभए पनि ठुलो मूल्य बराबरको चोरी भएको पाइएको डिएसपी जोशीले बताए । उनका अनुसार पसलमा सिसी क्यामेरा पनि थियो । तर, क्यामेराको फुटेजबाट चोरको पहिचान गर्न प्रहरीलाई गाह्रो परिरहेको छ । चोरीमा संलग्नको खोजी एवं पहिचानका लागि इलाका प्रहरी कार्यालय पथरीबाट डिएसपी मोहनविक्रम दाहाल र इलाका प्रहरी कार्यालय उर्लाबारीबाट सइ चूडामणि पौडेलको नेतृत्वमा संयुक्त टोली परिचालित छ । चोरीमा संलग्न गिरोहको खोजीमा प्रहरीको विशेष टोलीसमेत परिचालित रहेको डिएसपी जोशीले बताए ।