पोखराबाट आउँदै पूर्वराजा ज्ञानेन्द्र, काठमाडाैंमा 'हाइ अलर्ट'

काठमाडौँ । पूर्वराजा ज्ञानेन्द्र शाह पोखराको एक साता बसाइँपछि काठमाडौँ फर्किँदा राजावादी दल र समूहहरूले उनको स्वागतमा प्रदर्शन गर्दैछन् । उनीहरूको प्रदर्शनलाई मध्यनजर गरी काठमाडौँमा सुरक्षाकर्मीलाई ‘हाई अलर्ट’मा राखिएको छ । आज बिहानैदेखि काठमाडौँको नारायणहिटी दरबार सङ्ग्रहालय, त्रिभुवन अन्तर्राष्ट्रिय विमानस्थल सहित चाबहिल, गौशाला लगायत संवेदनशील क्षेत्रहरूमा सुरक्षाकर्मीहरूलाई परिचालन गरिएको काठमाडौँ उपत्यका ट्राफिक प्रहरी कार्यालयका उपरीक्षक सञ्जय बहादुर राउतले बताए । उनले भने, ‘आज पोखराबाट  पूर्व राजा आउँदै  हुनुहुन्छ । बिहानैदेखि काठमाडौँको नारायणहिटी दरबार सङ्ग्रहालय, त्रिभुवन अन्तर्राष्ट्रिय विमानस्थल सहित चाबहिल, गौशाला, महाराजगन्ज लगायत संवेदनशील क्षेत्रहरूमा सुरक्षाकर्मीहरू परिचालन छन् । आवश्यकता अनुसार सुरक्षाकर्मीहरू परिचालन गरिएका छन् । जस्तो परिस्थिति आए पनि सामना गर्ने गरी रणनीति बनाएका छौँ ।’ पूर्वराजा ज्ञानेन्द्र शाह पोखराबाट आज दिउँसो काठमाडौँ आउँदैछन् । उनको स्वागतका लागि राजावादीहरू काठमाडौँका विभिन्न स्थानबाट जुलुससहित त्रिभुवन अन्तर्राष्ट्रिय विमानस्थलको गेट अगाडि भेला हुने तयारीमा छन् ।