काठमाडौँ । नेपाली काङ्ग्रेस निकट नेपाल विद्यार्थी सङ्घले चैत्र १५ गते भएको अराजक गतिविधि, लुटपाट र हत्या, हिंसा जस्ता क्रूरतापूर्ण घटनाले राजावादीहरूको निरङ्कुश, अत्याचारी, सामन्ती सोच र शैली पुनः उजागर गरेको उल्लेख गरेको छ ।
सङ्घका अध्यक्ष डुजाङ शेर्पाले शनिवार प्रेस विज्ञप्ति जारी गर्दै सङ्घले अराजक गतिविधि, लुटपाट, सार्वजनिक तथा निजी सम्पत्तिमा तोडफोड, व्यवसायीहरू माथिको नियोजित आक्रमण, स्वतन्त्र पत्रकारिताको मर्मलाई कुल्चिँदै गरिएको हत्या, हिंसा जस्ता क्रूरतापूर्ण घटनाले राजावादीहरूको निरङ्कुश शैली पुनः उजागर गरेको उल्लेख गरेका हुन् ।
‘नेपालको संविधानले लोकतान्त्रिक प्रणालीलाई आत्मसाथ गर्दै हरेक नागरिकलाई अभिव्यक्ति स्वतन्त्रता, सभा सम्मेलन गर्ने, राजनीतिक सङ्घसंस्था खोल्न पाउने तथा शान्तिपूर्ण रूपमा विरोध प्रदर्शन गर्न पाउने अधिकार सुनिश्चित गरेको छ ।
तर काठमाडौँमा अनियन्त्रित भीडद्वारा गरिएको अराजक गतिविधि, लुटपाट, सार्वजनिक तथा निजी सम्पत्तिमा तोडफोड, व्यवसायीहरू माथिको नियोजित आक्रमण, स्वतन्य पत्रकारिताको मर्मलाई कुल्चिँदै गरिएको हत्या, हिंसा जस्ता क्रूरतापूर्ण घटनाले राजावादीहरूको निरङ्कुश, अत्याचारी, सामन्ती सोच र शैली पुनः उजागर गरेको छ,’ विज्ञप्तिमा भनिएको छ ।
नेपाल विद्यार्थी सङ्घले यस्ता हिंसात्मक गतिविधिहरूको घोर भर्त्सना गर्दै स्पष्ट रूपमा चेतावनी दिँदै यस्ता क्रूर, सर्वसाधारण नागरिकका घर, व्यवसायी तथा सार्वजनिक सम्पत्ति तोडफोड गर्ने, अराजकता फैलाउने, लुटपाट गर्ने जस्ता हिंसात्मक कार्यको कडा प्रतिकार गरेको छ ।
‘लोकतन्त्रको मर्मलाई कुल्चिने असंवैधानिक, गैर राजनीतिक तथा आपराधिक गतिविधिको विरुद्धमा खरो प्रतिवाद गर्न आम नागरिक, नागरिक समाज, बुद्धिजीवी तथा विद्यार्थी सार्थीहरुलाई हार्दिक आह्वान समेत गर्दछौँ,’ नेविसंघले भनेको छ ।
यसको साथै, सङ्घले एसइई परीक्षामा सहभागी विद्यार्थीहरूलाई पर्न गएको असुविधा, असहज स्थितिप्रति खेद प्रकट गर्दै विद्यार्थीको हक, अधिकार साधै सुरक्षित र शान्तिपूर्ण वातावरणको सुनिश्चित गर्न माग गरेको छ ।
साथै आम नागरिक, सुरक्षाकर्मी एवं व्यवसायमा पुगेको जनधनको उचित क्षतिपूर्ति सुनिश्चित गर्न माग गरेको छ ।
प्रतिक्रिया