कांग्रेस एमालेसँग मिसिन गएको होइन, फोहोर सफा गर्न गएको हो : गगन थापा

काठमाडौँ । नेपाली काँग्रेसका महामन्त्री गगन थापाले एमालेसँग सहकार्य गर्दा अपेक्षित रूपमा जनताले चाहेका काम पूरा नभएको भन्दै असन्तुष्टि व्यक्त गरेका छन् । मङ्गलवार काठमाडौँमा बौद्धिक पेसाकर्मी अभियान परिषद्ले आयोजना गरेको नयाँ वर्षको शुभकामना आदान प्रदान कार्यक्रममा बोल्दै उनले दुई ठुला पार्टी मिलेर सरकार बनाइसकेपछि संविधानमा केही कुराहरू बदलाव ल्याउने कुरा तुरुन्त प्रारम्भ हुन्छ भन्ने आशा भए पनि त्यो पूरा हुन नसकेको बताए । उनले भने, ‘काँग्रेसले भरोसा दिन सकेको छैन । नेकपा एमालेसँग मिलेर सरकारमा गयौँ । एमालेसँग मिलेर सरकार गएपछि के ठानेका थियौँ भने दुई ठुला पार्टी मिलेर सरकार बनाइसकेपछि संविधानका पनि केही कुराहरूमा बदलाव ल्याउने कुरा तुरुन्त काम प्रारम्भ गर्छौँ । खासगरी गभर्नेन्समा व्यापक सुधार गर्छौँ भन्ने थियो । त्यो पनि ढिला भएको छ ।’ त्यस्तै उनले २०६० देखि ७० सालसम्मको दश वर्ष माओवादी हिंसाले सृजना गरेको परिणामहरूको व्यवस्थापन गर्दै दश वर्ष बितेको बताए । अब मुख्य रूपमा काम गर्ने बेलामा आइसकेपछि पनि धेरै ठुलो अलमलको अवस्था सृजना भइरहेको उनको भनाई छ । उनले भने,‘यो २०६० देखि ७० सालसम्मको दश वर्ष माओवादी हिंसाले सृजना गरेका जति पनि परिणामहरू रहे त्यसको व्यवस्थापन गर्दै दश वर्ष बित्यो । अब दौडने बेला भयो । संविधान पनि बन्यो सिस्टम पनि बन्यो । त्यहाँभित्र पनि समस्या त छन् त्यसलाई सम्बोधन गर्ने सच्याउने कुरा त छँदै छ । अब मुख्य रूपमा काम गर्ने बेलामा आइसकेपछि चाहिँ धेरै ठुलो अलमलको अवस्था सृजना भइरहेको छ ।’ त्यस्तै उनले एमालेभित्रको फोहोर सफा गर्न सहकार्य गरेको भन्दै त्यही मिसिन भने नगएको दाबी गरे । उनले भने,‘यत्ति कुरामा विश्वास गर्नुस् फोहोर सफा गर्न पोखरीमा छिरेका छौँ । त्यसैले बाहिरबाट हेर्दा फोहोरै देखिन्छ । ‘तर, हामी मिसिन गएको होइन । सफा गर्न गएको हो । हामी मिसिँदैनौँ । त्यसकै अङ्ग बन्न गएकै होइन ।’ देशमा कंकटको गतिकामा काम गर्नुपर्ने बेलामा सरकार ट्याक्टरको गतिमा बढेको भन्दै उनले सरकारले अपेक्षित गति पकड्न नसकेको टिप्पणी गरे ।