इन्डोनेसियाको ऊर्जा क्षेत्रमा उल्लेखनीय वृद्धि

इन्डोनेसियाको ऊर्जा तथा खनिज स्रोत मन्त्रालयले सन् २०२५ को पहिलो छ महिनामा ऊर्जा तथा खनिज क्षेत्रमा १३.९ अर्ब अमेरिकी डलरको लगानी भित्रिएको जानकारी दिएको छ । यो पछिल्ला पाँच वर्षमा भएको सबैभन्दा ठूलो लगानी हो ।

यो लगानी सन् २०२४ को सोही अवधिको तुलनामा २४.१ प्रतिशतले वृद्धि भएको हो, जहाँ कुल लगानी ११.२ अर्ब डलर थियो ।

ऊर्जा तथा खनिज स्रोत मन्त्री बहलिल लाहाडालियाका अनुसार, सबैभन्दा धेरै लगानी तेल तथा प्राकृतिक ग्यास क्षेत्रमा भएको छ, जसको कुल रकम ८.१ अर्ब डलर पुगेको छ । त्यसपछि खनिज र कोइला क्षेत्रमा ३.१ अर्ब डलरको लगानी भएको छ ।

यसअघि, इन्डोनेसियाका लगानी तथा औद्योगिक मूल्य अभिवृद्धि मन्त्री रोसान रोसलानीले पनि यस वर्षको दोस्रो त्रैमासमा कुल लगानी ४७७.७ ट्रिलियन रुपिया (झण्डै २९.३ अर्ब डलर) पुगेको बताएका थिए, जुन अघिल्लो वर्षको तुलनामा ११.५ प्रतिशतले वृद्धि भएको हो ।