सशस्त्र प्रहरी रौतहट : वर्ष दिनमा २ करोड ८० लाख बढीको सामान बरामद

बुधबार, ०५ बैशाख २०८१
सञ्जय मिश्र रौतहट, ५ वैशाख। रौतहट स्थित सशस्त्र प्रहरीले १ वर्षको अवधिमा दुई करोड बढीको अवैध सामान,२४ जना मानिस सहित ७८ वटा सवारी साधन बरामद गरेको छ। तस्करीको माध्यम बाट भित्र्याइएको दुई करोड ८० लाख रुपैयाँ भन्दा बढीको विभिन्न प्रकारको भारतीय अवैध सामान बरामद गरेको हो। गत साउन १ गते देखी चैत्र मसान्तसम्म जम्मा भारत बाट विभिन्न नाका हुँदै भित्र्याइएको दुई करोड ८० लाख ४३ हजार ५६४ रुपैयाँ बराबरको अवैध सामान बरामद गरिएको सशस्त्र प्रहरी रौतहटका प्रमुख एसपी विक्रम हुमागाईँले बताएका छन्। गत चैत मात्र १ महिनाको अवधिमा मात्रै ३६ लाख ४५ हजार ९८४ रुपैयाँ बराबरको अवैध सामान बरामद गरेको थियो। बरामद सम्पूर्ण सामान आवश्यक कारबाहीको लागि जिल्ला भन्सार कार्यालय गौरमा बुझाइएको एसपी हुमागाईँले जानकारी दिएका छन्। अवैध सामान ओसारपसारमा संलग्न १३ जना, लागू औषध कारोबारमा संलग्न २ जना, हात हतियार सहित पक्राउ परेका ३ जना र बन पैदावार ओसारपसारमा संलग्न ६ जना गरी जम्मा २४ जना मानिसलाई पक्राउ गरी आवश्यक कारबाहीका लागि सम्बन्धित निकायमा बुझाइएको एसपी हुमागाईँले बताएका छन्। त्यसै गरी तस्करी लगायत विभिन्न अवैध कारोबारमा बरामद भएको बस १ वटा, पिक अप र बलेरो ३ वटा, अटो १ वटा, इलेक्ट्रिक लोडर, १ वटा, मोटरसाइकल ४२ वटा, ट्याक्टर १७ वटा, साइकल ११ वटा, गाडा २ वटासहित विभिन्न किसिमका ७८ वटा सवारी साधन भन्सार कार्यालयमा,राजश्व कार्यालय, बन कार्यालय, नगरपालिकाको कार्यालय लगायत सम्बन्धित कार्यालयमा दाखिला गरिएको सशस्त्र प्रहरी रौतहटको सूचनामा उल्लेख गरिएको छ। गत आर्थिक वर्षमा भारत बाट चोरी लुकी तस्करहरूले भित्र्याएको कुल पाँच लाख ३५ हजार ५८० रुपैयाँ बराबरको १६ क्विन्टल ६१ किलो प्रतिबन्धित अवैध कुखुरा बरामद गरी नष्ट गरेको सशस्त्र प्रहरीले जारी गरेको सूचनामा उल्लेख गरिएको छ।त्यस्तै सशस्त्र प्रहरी बल, नेपालको परिचालनबाट २०८० मङ्सिर ३ गते यमुना माई–३ मल्हिनिया टोलमा शेख बैतुल्लाहको कच्ची घरबाट पेस्तोल ३, सोमा प्रयोग हुने म्यागेजिन ६ थान ,७।६५ एमएमको १३ राउन्ड गोली, एयर गन १ नाल गरी जम्मा ४ नाल हतियार बरामद गरेको थियो। त्यस्तै गत चैत २ गते परोहा नगरपालिका ९ घिउरा गाउँमा मनि ट्रान्सफर्मरमा गोली फायर गरी फरार ३ जना भारतीय नागरिकहरूको साथबाट २ थान पेस्तोल र ५ राउन्ड गोली, सहित भारतीय नम्बरको एउटा मोटरसाइकल बरामद गरेको थियो।सोही अवधिमा भारतीय समकक्षी एसएसबिसँग मिलेर सशस्त्र प्रहरीले १२५ पटक संयुक्त बोर्डर गस्ती गरेको थियो। प्रादेशिक अस्पताल गौर लगायत जिल्लाको विभिन्न अस्पतालमा उपचारको क्रममा बिरामीलाई रगत अभाव हुँदा सशस्त्र प्रहरीले गत साउन देखी चैत्र मसान्त सम्म ५१ पटक रक्तदान गरेको छ। परोहा ९ खाप स्थित रहेको शिबम मनिट्रान्फरका सञ्चालक वर्ष २५ का नितेश साहलाई गोली हानी भाग्दै गरेको अवस्थामा सशस्त्र प्रहरी बल, बोर्डर आउट पोस्ट रामपुर खापबाट खटिएको चेकप्वाईन्ट टोलीले ३ जना भारतीय नागरिकहरूलाई नियन्त्रणमा लिएको थियो । घटनास्थलमा सशस्त्र प्रहरी ११ गण हेड क्वाटर गौरका प्रमुख एसपी विक्रम हुमागाईँ र जिल्ला प्रहरी कार्यालय गौरबाट तत्कालीन एसपी महेन्द्र कुमार श्रेष्ठको संयुक्त टोली सर्च गर्ने क्रममा १ नाल कटुवा पेस्तोल, १ नाल अटोमेटिक पेस्तोल र ६ राउन्ड गोली सहित तीन जना भारतीय अपराधीलाई पक्राउ गरेको थियो। त्यस्तै, ईशनाथ नगरपालिका ७ ठुलो घिउरा गाउँमा सरस्वतीको मूर्ति विसर्जनको विषयलाई लिएर हिन्दु र मुस्लिम समुदायका हजारौँ जना स्थानीयहरू बिच झडप हुँदा सशस्त्र प्रहरी बल, नेपालको ३५० जना र नेपाल प्रहरीको ४५० जनाको टोली परिचालन भई स्थितिलाई नियन्त्रणमा लिई ठुलो धनजनको क्षति हुन नदिएको सूचनामा उल्लेख गरिएको छ। आर्थिक वर्ष २०८०÷०८१ मा रौतहट स्थित विपद् व्यवस्थापन सम्बन्धी कक्षा–४०, लागूऔषध सम्बन्धी कक्षा–४५ र सीमा सम्बन्धी १९ वटा जनचेतनामूलक कार्यक्रमको आयोजना गरेको थियो । सोही अवधिमा जिल्लाको विभिन्न स्थानमा भएको ५२ वटा आगलागीको घटनामा ३४० जना, १५ डुबानको घटनामा ३४१ जना, २५ सवारी दुर्घटनामा ३६७ जनालगायत १५३ वटा विभिन्न घटनामा १४ सय २० जनशक्ति परिचालन गरिएको एसपी हुमागाईँले जानकारी दिएका छन्। सीमावासीसँग सशस्त्र प्रहरी” कार्यक्रम अन्तर्गत गत फागुन २६ गते परोहा–५ लौकाहामा सञ्चालन भएको निः शुल्क स्वास्थ्य शिविरबाट १४०२ जना स्थानीयहरू लाभान्वित भएका थिए। “सीमावासीसँग सशस्त्र प्रहरी” कार्यक्रम क्यूआईपी प्रोजेक्ट अन्तर्गत गत माघ २९ गते गौर– १ स्थित दलित बस्तीमा निर्मित “सामुदायिक खानेपानीको धारा”बाट स्थानीय ४०० जना लाभान्वित भएका छन्। गत आर्थिक वर्षमा सशस्त्र प्रहरी निरीक्षकको कमान्डमा लामो दुरीको गस्ती एलआरपी २० वटामा ३०० जनशक्ति परिचालित, सशस्त्र प्रहरी निरीक्षकको कमान्डमा ३५ जना सीमामा २४र७ सीमा गस्ती सञ्चालन गरिएको सशस्त्र प्रहरी रौतहटको सूचनामा उल्लेख गरिएको छ ।  

प्रतिक्रिया

प्रदेश खबर
लेखकको बारेमा
प्रदेश खबर

सम्बन्धित समाचार