स्वास्थ्य मन्त्रीलाई जब खोयाको माला र खोस्टाका फूलका गुच्छा लगाइयो...

पाँचथर : खोयाको माला ? सुन्दा आश्चार्य लाग्न सक्छ । पाँचथरको फालेलुङ फालेलुङ पुग्दा स्वास्थ्य तथा जनसंख्या मन्त्री प्रदीप पौडेललाई शनिवार गाउँपालिका अध्यक्ष बिरविक्रम थाम्सुहाङले मकैका खोयाबाट निर्मित माला लगाइदिए । सँगै रहेका उपाध्यक्ष महेन्द्रहाङ जवेगूले मकैकै खोस्टाबाट तयार पारिएको फूलगुच्छा हातमा थमाए । कर्मचारीहरूले खोस्टा निर्मित व्याच लगाइदिए । अतिथिहरूको आसन ग्रहण सकिएलगत्तै अध्यक्ष र उपाध्यक्ष दुवै जनाले मन्त्री पौडेल र पूर्व सांसद सीता थेवेलाई भेडाको उनबाट बुनेको अस्कोट पहि¥याए । मञ्चमा आसिन सबैलाई एकपछि अर्को गर्दै उनबाटै बुनेका टोपी लगाइदिएर सत्कार गरे । फालेलुङमा बाहिरबाट आयात गरिएका व्याच र खदा प्रयोगमा प्रतिबन्ध लगाइएको छ । स्थानीय उत्पादनलाइ प्रवर्धन गर्ने उदेस्यले एक वर्षअघि गाउँपालिकाले व्याच र खदा प्रयोग नगर्ने नीति अनुमोदन गरेको थियो । सोही नीति कार्यान्वयन गर्न गाउँपालिकाले आयोजना गरेका सबै कार्यक्रममा मकैका खोस्टा र खोयाबाट बनाइएका सामग्रीले अतिथि सत्कार गर्न थालेको हो । व्याच र खदा प्रयोग नगर्ने निर्णय पारित भएको एक वर्षसम्म गाउँमै उत्पादन भएको फूलका माला र गुच्छा प्रयोग ग¥र्यो । ‘पुष्प गुच्छा चाँडै वैलाउने भएकाले टिकाउ हुने सामग्रीको विकल्प खोज्दै मकैका खोस्टा र खोयाका सामग्री प्रयोग गर्न थालेका हौं,’ गाउँपालिका अध्यक्ष थाम्सुहाङले भने । कार्यक्रममा उपस्थित अतिथिलाई स्वागत गर्ने मात्रै होइन, गाउँपालिकाको प्रशासकीय भवन उद्घाटन समारोहका लागि तयार पारिएको स्टेच अगाडि राखिएको टि–टेबल पनि खोस्टाबाट निर्मित फूल गुच्छाले सजाइएको थियो । फालेलुङमा रैथाने मकैका खोया र खोस्टाबाट निर्मित सामग्री प्रयोग गर्न थालिएको जानकारी पाएका मन्त्री पौडेलले मन्तव्यका क्रममा गाउँपालिकाको यो अभियानलाई खुलेरै प्रशंसा गरे । ‘पछिल्लो समय विकास भन्ने बित्तिकै ठूल–ठूला भवन र पुर्वाधारलाई मात्रै बुझ्ने गरिन्छ, यो गलत हो । यहाँ निर्मित अस्पताल र प्रशासकीय भवनमा करोडौं खर्च भएको छ, त्यो पैसा सडकको स्तरबृत्तीमा लगानी गरेर भवन र भवन पनि स्थानीय सामग्री प्रयोग गर्न सकिन्थ्यो,त्यहॉ चाहिने फर्निचर पनि यहि‘का सामग्री प्रयोग मिल्थ्यो । अब बन्ने पूर्वाधार स्थानीयता र मौलिकता झल्किनुपर्छ,’ मन्त्री पौडेलले भने । फालेलुङकै उत्पादनले आफुलाइ स्वागत गर्दा हर्षित भएको उनको टिप्पणी थियो । फालेलुङमा अतिथि सत्कारका लागि आयातित व्याच र खदा प्रतिवन्ध लगाइएसँगै मकैका खोया र खोस्टाबाट सामग्री निर्माण गर्न तालिम नै चलाइएको थियो । ५ नम्बर वडामा सञ्चालित सामुदायिक होमस्टेले यी सामग्री निर्माण गर्दै आएको छ । स्थानीय शिल्पकुमार राईका अनुसार खोस्टाबाट फूल बनाउन रङ र ब्याडिङ तार बाहेक अरू सामग्री आवश्यक पर्दैन । कैँचीले काटेर चारकुना मिलाइएका खोस्टा नून पानीमा भिजाएर रङ लगाएपछि फूल बनाउन तयार हुन्छन् । यस्तै, मकैका खोयालाई साइज मिलाएर काटेपछि रङ भरेर डोरीमा उन्दा आकर्षक माला तयार हुन्छन् । यसरी खोया र खोस्टाबाट अतिथि सत्कारका सामाग्री निर्माण गर्दा सस्तो र सजिलो हुने बताइएको छ ।